«Արաքս» թռչնաֆաբրիկան խաբում է իր գնորդներին՝ մի ապրանքատեսակի անվան տակ վաճառելով մեկ այլ ապրանքատեսակ․ ահազանգ

«Արաքս թռչնաֆաբրիկա» փակ բաժնետիրական ընկերությունը խաբում է գնորդներին։ Այս ահազանգով NEWSPRESS.am-ի խմբագրություն էր դիմել մի քաղաքացի, ով իր հետ նկարներ ու մսամթերքի պիտակ էր բերել։

Բանն այն է, որ կինը դժգոհում էր այն բանից, որ ինքը մի ապրանքանիշի անվան տակ ձեռք է բերել մեկ այլ ապրանքանիշ։ Ավելի կոնկրետ՝ «Արաքս թռչնաֆաբրիկա»-ի փաթեթավորված բդիկների մեջ, պարզվել է, եղել են նաև հավի այլ կտորներ՝ թևիկներ և վիզ։

Հարկ է նկատել, որ հիշյալ ապրաքատեսակները վաճառվում են տարբեր գներով։ Հավի վիզն ու թևիկներն ավելի էժան են, քան, օրինակ, բդիկներն ու կրծքամիսը։ 

Մեզ դիմած քաղաքացին նկատեց, որ ինքը վերցրել է փաթեթավորված այն տարան, որի մեջ, գոնե վերևի մասում դրված են եղել բդիկներն ու նշված է եղել նաև գինն ու ապրանքատեսակը։ Սակայն տուն տանելով՝ պարզվել է, որ փափուկ մսերի տակ «թաքցրած են» եղել վիզն ու թևիկները։

«Ես բդի գին եմ տվել, բայց պարզվում ա՝ սենց խաբել են ինձ»,- սրտնեղած ասաց կինը, ում վրա, փաստորեն, կրկնակի թանկ էր նստել վիզը։

Դա մի կողմից, մյուս կողմից էլ՝ նա նկատեց, որ այդ վզի կտորը միանշանակ հին էր ու հոտ էր գալիս։ Նա անմիջապես դեն է նետել այն։

Ստացվում է, որ «Արաքս թռչնաֆաբրիկա» իր գնորդին մոլորության մեջ է գցել, ինչի հիման վրա NEWSPRESS.am—ը հրավիրում է պատկան մարմինների ուշադրությունը խնդրին, որպեսզի նման իրավիճակներն այլևս չկրկնվեն։