Մարդիկ կամա թե ակամա մեծ գիտափորձի մեջ են մտնում․ իրավապաշտպանը՝ կորոնավիրուսի դեմ պատվաստումների մասին

Իշխանությունները նոր ձև են գտել, որպեսզի ստիպեն մարդկանց պատվաստվել։ Այս մասին այսօր կայացած մամուլի ասուլիսի ժամանակ հայտարարեց իրաապաշտպան Ռուբեն Մելիքյանը։ 

Նրա խոսքով՝ այն մարդիկ, որոնք պետք է պատվաստվեն, կամա թե ակամա մեծ գիտափորձի մեջ են մտնում։ Այսինքն՝ այս պատվաստանյութերն ընդամենը մի քանի ամսվա կյանք ունեն և առհասարակ մարդիկ տեղյակ չեն դրանց ազդեցության մասին։ Ուստի հնարավոր չէ պնդել, որ դրանք անվտանգ են։ 

«Բազմաթիվ են դեպքերը, երբ մարդիկ պատվաստվում են, կրկին հիվանդանում են։ Ստացվում է, որ մարդկանց ստիպում են մասնակցել ինչ-որ գիտափորձի։ Իմ պատկերացմամբ՝ սա սահմանադրական կարգի խախտում է, ինչի մասին իմ շատ գործընկերներ ևս խոսում են։ Մեր իշխանությունները ստիպում են մարդկանց կա՛մ երկու շաբաթը մեկ անհամաչափ ծախսեր կատարել, կա՛մ պատվաստվել։ Սա լուրջ խնդիր է»,- նշեց Մելիքյանը և փաստեց, որ մարդիկ կարող են բախվել աշխատանքային իրավունքների խախտումների հետ։ 

Մելիքյանի խոսքով՝ ինքը ևս դեռ չի որոշել՝ պատվաստվե՞լ, թե՞ ոչ, քանի որ շատ ծանոթներ ունի, որոնք պատվաստվելուց հետո վարակվել են և շատ ծանր տարել հիվանդությունը։ 

Իրավապաշտպանի խոսքով՝ գուցե առաջիկայում դատարանների աշխատանքները ծանրաբեռնվեն, քանի որ մարդիկ կարող է համատարած դիմեն դատարաններ։ 

«Մարդկանց պետք է ընտրության հնարավորություն տալ, ոչ թե պարտադրել։ Ես ամենևին էլ դեմ չենմ արտահայտվում»,- նշեց իրավապաշտանը։