«Սուրբ Աստվածամայր» ԲԿ-ի բժիշկների թույլ տված սխալի հետևանքով 7 ամսական աղջնակի առողջական վիճակն էլ ավելի է վատացել

2 օր առաջ NEWSPRESS.am-ին էր դիմել Երևանի բնակչուհի Ժաննա Ասատրյանը և հայտնել, որ իրեն և իր 7 ամսական աղջկան՝ Արփի Ավետիսյանին, «Սուրբ Աստվածամայր» ԲԿ-ում վատ են վերաբերվել։

Հիշեցման կարգով նշենք, որ աղջկան ու նրա մորն ընդունել են բարձր ջերմությամբ։ Սկզբում ասել են, որ երեխան բրոնխների խնդիր ունի, ապա 2 օր անց նրանց ասել են, որ կորոնովիրուսով հիվանդացել է և դուրս են գրել հիվանդանոցից։ 

Փոխանակ նրանց տեղափոխումը Շտապօգնության մեքենայով կազմակերպելու մեկ այլ՝ մասնագիտացված հիվանդանոց, հիվանդ երեխայի մորը բժիշկները պարզապես հորդորել են երեխային տանել իրենց հիվանդանոցից ու ինչ-որ ձևով տեղափոխել մեկ այլ հիվանդանոց։

«Սուրբ Աստվածամայր» ԲԿ-ին ուղղված մեր հարցադրմանը, թե ինչու են երեխային տենդի մեջ դուրս գրել հիվանդանոցից, պատասխանեցին, թե իբր «երեխայի վիճակն արդեն լավ էր ու կայուն և նա առույգ էր»․․․

Իհարկե, շատ լավ կլիներ, որ ԲԿ-ի աշխատակիցները ճիշտ լինեին, սակայն վատն այն է, որ նրանց անփույթ աշխատանքի հետևանքով, արդեն այսօր՝ սեպտեմբերի 9-ին, երեխային տեղափոխել են Արաբկիրի հիվանդանոց, որտեղ նրա մոտ հայտնաբերել են երկկողմանի թոքաբորբ և հերքվել է կորոնավիրուսի վարկածը։

Ասել է թե, երեխային ի սկզբանե սխալ բուժում է նշանակվել ու միջերակային կաթիլային ներարկումներն արվել են մեկ այլ հիվանդության դեմ։

NEWSPRESS.am—ի անձնակազմը փոքրիկին շուտափույթ ապաքինում է ցանկանում, իսկ «Սուրբ Աստվածամայր» ԲԿ-ի ղեկավարությանը հորդորում պատասխանատվության ենթարկել այն աշխատողներին, որոնց սխալ ախտորոշման հետևանքով երեխայի առողջական վիճակն ավելի է վատացել․․․

Արմինե Մկրտումյան