Գերիների ու անհետ կորածների հարազատների համբերության բաժակը լցվել է. Արարատ Միրզոյանը չի ընդունել անհետ կորածների և գերիների հարազատներին. Exclusive.am

Exclusive.am-ի տեղեկություններով՝ օրերս անհետ կորածների և գերիների հարազատները՝ թվով շուրջ 30-35 մարդ, գնացել են Արտաքին գործերի նախարարություն՝ հանդիպելու նորանշանակ նախարար Արարատ Միրզոյանին և նրանից իրենց զինծառայողների մասին որևէ տեղեկություն ստանալու:

Հարազատներին, սակայն, ընդունել է ոչ թե հենց Միրզոյանը, այլ նախարարության 3 ներկայացուցիչ. ծնողներն անգամ չեն հետաքրքրվել, թե ի պաշտոնե ովքեր են այդ ներկայացուցիչները, քանի որ իրենց նպատակը հենց նախարար Միրզոյանի հետ հանդիպելն է եղել:

Վերջինս չի ընդունել հարազատներին. բացատրել են, թե նախապես է պետք պայմանավորվել հանդիպման համար: Հեռախոսահամար են վերցրել ու ասել՝ կզանգենք:

ԱԳՆ աշխատակիցների հետ զրույցից ծնողներն առանձնապես տպավորված չեն. նրանք միայն լսել են իրենց հարցերն ու գրի առել դրանք:

«Ասացին՝ նախօրոք պետք է պայմանավորվեք, ինքը զբաղված է: Հետո իբր իրենք պետք է կանչեն, կարող է 10 հոգու հետ հանդիպի: Ասել են՝ բոլորի հետ հանդիպել հնարավոր չէ՝ մենք սրահ չունենք: Սրահ չունեն, թող դրսում հանդիպի, հո չե՞նք եկել իրեն ուտենք, ուտող լինենք, կմտնենք ներսը կուտենք: Միրզոյանի հետ հանդիպման հավանական ժամկետ չի նշվել: Ես չեմ հավատում, որ կհանդիպենք: հանդիպենք էլ, լուրջ բան չի լինելու, որովհետև բոլորը նույն հեքիաթներն են: Բոլորը, որ կառույցն ուզում ես, մտիր: Մեզ ոչ մի լուրջ պատասխան չեն տալիս: Հանդիպման եկածներից մեկն ասաց, որ շուրջ 80 մարդու մասին փաստաթղթավորված տեղեկություններ ունեն, մյուսն ասաց 80 չի, շատ է՝ մոտ 200: Կարճ ասած՝ բանից անտեղյակ մարդիկ էին՝ խոսեինք, լսեին, թողնեինք-գնայինք»,- ասաց մեր զրուցակիցը:

Նա հավելեց, որ զինծառայողների հարազատներից մեկն էլ ԱԳՆ ներկայացուցիչներին ասել է, որ ինքն անհերքելի ապացույցներ ունի այն մասին, որ մեր գերիների թիվն առնվազն 680 է:

Ծնողները նաև հարց են ուղղել ԱԳՆ ներկայացուցիչներին, թե ինչպե՞ս է ստացվել, որ ամիսներ շարունակ ԱԳ նախարար չենք ունեցել, բայց գերիներ են վերադարձել, իսկ հիմա նախարարը նշանակված է, սակայն, սայլը տեղից չի շարժվում:

«Մեր համբերության բաժակը լցվել է, էլ հնարավոր է, ծնողներն էլ չգիտեն՝ ինչ է լինելու վերջը»,- ասաց Exclusive.am-ի զրուցակիցը: