Արայիկ Հարությունյանի հետ մտերմացել եմ, Սյունիքի փոխմարզպետն էլ իմ մորեղբոր որդին է․ ՔՊ-ական պատգամավոր (տեսանյութ)

Որոտանը և ԱԱԾ-ի կողմից ադրբեջաներեն անվանմամբ ասված տեղանքն իրարից բավականին հեռու են։ Այս մասին ասել է ԱԺ «Իմ քայլը» խմբակցության պատգամավոր Դավիթ Դանիելյանը՝ անդրադառնալով Որոտանի ճանապարհային հատվածում ադրբեջանցիների կողմից ոստիկանական հենակետ տեղադրելու թեմային և դրան հետևած ԱԱԾ հայտարարությանը։

Նա նաև խուսափեց խոսել Սյունիքում տիրող իրավիճակից։

«Կարծում եմ՝ ավելի լավ է այդ մասին Ազգային անվտանգությունը պետք է տեղեկատվություն տա»,- ասաց նա։

Դիտարկմանը, թե երաշխիք չկա, որ ադրբեջանցիները հայկական ավտոմեքենաները ևս չեն կանգեցնի, կապանցի պատգամավորը պատասխանեց, թե ճիշտ չի լինի, որ երաշխիքների մասին ինքը խոսի և համապատասխան մարմիններն այդ մասին կխոսեն։

Ինչ վերաբերում է այն հայտարարություններին, թե Սև լճի տրածքում թշնամին ակտիվ ինժեներական աշխատանքներ է իրականցնում և պատրաստվում է ձմռանը, ապա պատգամավորն այս հարցի շուրջ ևս ասելիք չուներ․ «Ցանկացած հայտարարություններ անելիս պետք է բոլորը մտածեն, որ բոլորիս նպատակը հայկական շահը մեկն է, և պետք է պաշտոնական տեղեկատվություններին հետևենք»։

Անդրադառնալով առաջիկա ՏԻՄ ընտրություններին և իր թեկնածությանը Կապանի քաղաքապետի ընտրություններում՝ պատգամավորը հերքեց լուրերն այն մասին, թե չարաշահելով իր դիրքը քարոզարշավներ է իրականացրել Կապանում։

Առհասարակ նա իշխանության այս կամ այն անդամի հետ մտերիմ կապը նորմալ է համարում։

Դավիթ Դանիելյանը չի հերքում՝ աշխատել ԿԳՄՍ նախարար Արայիկ Հարությունյանի հետ ու մտերմացնել նրա հետ։ Իսկ Սյունիքի փոխմարզպետն էլ իր մորեղբոր որդին է։

«Մեր գյուղի տանն իրար հետ ենք մեծացել»,- ասաց պատգամավորը։