Արմեն Չարչյանը դժվար է հաղորդակցվում․ նրա մոտ նաև զարգացած թոքաբորբ է հայտնաբերվել․ Արամ Վարդևանյան (տեսանյութ)
Բժշկական միջամտության չափորոշիչները 60 տոկոսից բարձր են․ Արմեն Չարչյանի վիճակը կարելի է գնահատել կրիտիկական։ Այս մասին լրագրողների հետ զրույցում ասաց «Հայաստան» խմբակցության պատգամավոր Արամ Վարդևանյանը՝ «Հայաստան» խմբակցության պատգամավոր, պրոֆեսոր Արմեն Չարչյանին այցելելուց հետո։
«Որպեսզի ավելի ճիշտ պատկերացնենք նրա վիճակը՝ ասեմ, որ Արմեն Չարչյանը ստանում է ինսուլինի 100-ից ավել չափաբաժին։ Սա արդեն անհամատեղելի է նրա կալանքի հետ»,- ասաց Արամ Վարդևանյանը։
Նրա խոսքով՝ բացի այդ, հետազոտությունները պարզել են, որ Արմեն Չարչյանի մոտ առկա է նաև զարգացած թոքաբորբ։ Վարդևանյանը նկատում է, որ նախկին այցելության ժամանակ դեռևս նրա մոտ այն չէին հայտնաբերել։
«Ինտեսիվ բժշկական հսկողության տակ գտնվելու արդյունքում Արմեն Չարչյանի վիճակը որոշակի կայունության է հանգեցրել, բայց թոքաբորբի և բարձր միավոր ինսուլինի պայմաններում ծայրահեղ վիճակ է առաջանում»,-ասաց Վարդևանյանը։
Նա ընդգծում է, որ Արմեն Չարչյանն իրենց հետ դժվարությամբ էր խոսում։
«Հասկացանք, որ հաղորդակցվելը դժվար է և շուտ սահմանափակեցինք զրույցը։ Զուտ տեսանք՝ ինչ պայմաններում է, ինչպես է իրեն զգում։ Իր կամքը տեղն է իհարկե, բայց նման պայմաններում մարդուն կալանավորված պահելը խոշտանգում է։ Դա մարդասիրական ցանկացած արժեքի ոչնչացում է»,- ասաց նա։
Մանրամասները՝ տեսանյութում
