Ուկրաինան կարող է պատժամիջոցներ կիրառել Հայաստանի և հայկական սփյուռքի դեմ

Ուկրաինայի նախագահի պաշտոնական կայքում ստորագրահավաք է սկսվել Հայաստանի և Բելառուսի դեմ պատժամիջոցների կիրառման վերաբերյալ, որոնք ՄԱԿ-ի 76-րդ Գլխավոր ասամբլեայում դեմ են քվեարկել Ուկրաինայի տարածքային ամբողջականությանը:

Ստորագրահավաքի նախաձեռնողներից մեկը, «տեղեկատվական դիմադրության» խմբի համակարգողը, Ուկրաինայի անվտանգության հետազոտությունների ինստիտուտի առաջատար մասնագետ, ռազմական և քաղաքական մեկնաբան Ալեքսանդր Կովալենկոն Report-ին ասել է, որ սեպտեմբերի 14 -ին հայտարարված միջնորդության քվեարկության գործընթացը շարունակվում է արագացված տեմպերով: 

Նա նշել է, որ ստորագրահավաքը կտևի 92 օր և պետք է ստանա 25000 դրական պատասխան:

«Մենք ցանկանում ենք օրենքի շրջանակներում պատժել նրանց, ովքեր ունեն Ուկրաինայի հետ շահեկան հարաբերություններ՝ մասնավորապես տնտեսական և առևտրային ոլորտներում, բայց դեմ են քվեարկում մեր երկրին: Օրինակ ՝ Բելառուսին և Հայաստանին: Մեր միջնորդության նպատակն է լուրջ պատժամիջոցներ կիրառել այն երկրների և նրանց սփյուռքի  դեմ, որոնք չեն հարգում Ուկրաինայի տարածքային ամբողջականությունը: Սա առաջին անգամը չէ, որ դա անում է Հայաստանը»,-ասել է Ա. Կովալենկոն։

Հիշեցնենք, որ ՄԱԿ -ի 76 -րդ Գլխավոր ասամբլեայի օրակարգում «Ուկրաինայի ժամանակավորապես օկուպացված տարածքներում իրավիճակի մասին» կետը ներառելու քվեարկության ժամանակ Հայաստանը դեմ է քվեարկել։