«Եկեք վատ բաներից չխոսենք». ԱՆ պաշտոնյայի պատասխանը հարցին, թե ո՞վ է պատասխան տալու, եթե պատվաստված քաղաքացին պատվաստվելու հետևանքով մահանա

«Ընկերուհուս ամուսինը երեկ մահացել է՝ պատվաստվելուց հետո: Նա ուղեկցող հիվանդություն է ունեցել, ասել են՝ դու ռիսկային գոտում ես, պետք է պատվաստվես: Ի դեպ, այդ հիվանդությամբ նա երկար տարիներ ապրել էր». տեղեկությունը մամուլի ասուլիսում հայտնեց լրագրողը:

Ի պատասխան՝ Հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելա Աբովյանը պատասխանեց, որ նախ պետք է պարզել մահվան հիմնական պատճառը, պետք է ապացուցել, որ տվյալ անձը մահացել է հենց պատվաստումից: 

«Մինչև այդ տեղեկատվությունը իմանալը, որևէ եզրակացության չենք կարող գալ: Վստահեցնում եմ, որ կա համապատասխան մասնագիտական խումբ, որը նման դեպքերով զբաղվում է: Եթե լինի պատվաստանյութով պայմանավորված մահվան դեպք, համոզված եղեք՝ այդ դեպքի մասին կահազանգվի: Նման դեպքեր ամբողջ աշխարհում են եղել, Հայաստանում էլ եղել են դեպքեր, որ անձը պատվաստվել ու մահացել է, բայց պատվաստանյութը չի եղել պատճառը»,- ասաց Աբովյանը:

Նա նշեց, որ պատվաստանյութը կանխում է կորոնավիրուսը, պատվաստանյութը չի կանխարգելում ուղեկցող հիվանդությունները, չի կարող նպաստել ուղեկցող հիվանդությունների զարգացմանը, որովհետև բաղադրությունն այնպիսին է, որ չի կարող կորոնավիրուս առաջացնել, ինչը շատ տարածված ապատեղեկատվություն է:

Հարցին, թե ո՞վ է պատասխան տալու, եթե պատվաստված քաղաքացին պատվաստվելու հետևանքով մահանա, Ռոմելա Աբովյանը պատասխանեց.

«Եկեք վատ բաներից չխոսենք: Նախ կարծում եմ՝ մենք նման դեպքեր չենք ունենա, երբ որ Աստված մի արասցե, եթե կլինի, արդեն պատասխանատուները պատասխան կտան: Մենք ունենք պատվաստումների ցածր ցուցանիշ՝ պատվաստումների հետ կապված, բայց նաև պետք է նշեմ, որ պատվաստումների ընթացքում չենք ունեցել որևէ անբարեհաջող ելք, ծանր հետպատվաստումային ռեակցիա և այլն»: