Ռուս խաղաղապահները Արցախի կրթական հաստատություններին տրամադրում են խմելու ջրի տարաներ

Ռուս խաղաղապահները, բարեգործական կազմակերպությունների ասոցիացիայի հետ համատեղ, Արցախի դպրոցական և նախադպրոցական հաստատություններում անցկացվող մարդասիրական ակցիայի շրջանակներում խմելու ջրի 14 տարա են փոխանցել վերջիններիս: Այդ մասին հայտնում է ՌԴ ՊՆ-ն:

«Այսօր մարդասիրական արձագանքման կենտրոնի աշխատակիցները ակցիա իրականացրեցին՝ դպրոցական հաստատություններին, մասնավորապես` Պատարա և Լուսաձոր երկու բնակավայրերի դպրոցներին, 5 և 3 տոննա տարողունակությամբ ջրի տարաներ ապահովելով: Այս դպրոցների աշակերտների ընդհանուր թիվը 300-ից ավելի է: Բարեգործական կազմակերպությունների ասոցիացիայի հետ միասին, նախատեսվում է նման ակցիա անցկացնել ևս 14 դպրոցում»,- ասել է ռուսական խաղաղապահ զորախմբի ներկայացուցիչ Ռուսլան Իվանովը և հավելել.

«Այս ուսումնական հաստատությունների ընտրությունը պատահական չէր, քանի որ նախորդ ամսվա ընթացքում հումանիտար արձագանքման կենտրոնի աշխատակիցները գնացել էին այդ դպրոցներ՝ «Խաղաղության դասեր» անցկացնելու և ծանոթացել էին այնտեղի սոցիալական պայմաններին, իսկ այդ հաստատություններում աշակերտների համար կար խմելու ջրի պակաս»:

Ըստ հաղորդագրության՝ ջրի տարաների նվիրատվությունից հետո ռուս խաղաղապահ զորախմբի զինծառայողները պարտավորություններ են ստանձնել դրանք լիքը պահելու նպատակով կանոնավոր ջրամատակարարում ապահովել: Նրանք ամեն օր ջրատարներով ջուր են լցնում այդ տարաների մեջ: Ներկայումս Արցախի Հանրապետության տարածքում խաղաղապահներն ամեն օր խմելու ջուր են հասցնում ավելի քան 1,5 հազար երեխայի:

«Այս պահին մենք իրականացնում ենք ջրի ապահովման ծրագիր, քանի որ ջրի հետ կապված խնդիրներ կան Արցախի տարածքում: Ռուս խաղաղապահ ուժերի հետ միասին մենք իրականացնում ենք այս գործողությունը և նաև ցանկանում եմ իմ և մեր կազմակերպությունների անունից շնորհակալություն հայտնել, քանի որ նրանց առաքելությունը և օգնությունը վիթխարի է: Միասին մենք իրականացնում ենք այն նախագծերը, որոնք էական նշանակություն ունեն տեղի բնակչության համար: Մենք արդեն միասին 9 ծրագիր ենք իրականացրել: Խաղաղապահ ուժերի մասնակցությամբ ունենք նաև դպրոցների վերանորոգման նախագծեր: Շնորհակալություն ռուսական խաղաղապահ ուժերին այնտեղ գտնվելու և օգնելու համար»,-ասել է բարեգործական կազմակերպության ներկայացուցիչ Օլեսյա Պոդոլսկայան:

Ըստ ՌԴ ՊՆ-ի՝ բարերարները ձեռք են բերել խմելու ջրի 21 տարա, որոնցից մի քանիսն արդեն հասցվել են Ռուսաստանից և խաղաղապահների կողմից փոխանցվել Արցախի դպրոցներին և մանկապարտեզներին: