Այսօր ԱԻ պետական ծառայության փրկարար ուժերի վարչության հրշեջ փրկարար մասի վարորդ-փրկարար Հովիկ Աղաջանյանի հիշատակի օրն է

ՆԳ նախարար Կարեն Սարգսյանը, առաջին տեղակալ Սամվել Պետրոսյանի, ԱԻՊԾ տնօրեն Մեխակ Արզումանյանի և համակարգի մի խումբ ծառայողների ուղեկցությամբ, այսօր Ասկերանի շրջանի Խնածախ համայնքում հարգանքի տուրք է մատուցել Հովիկ Աղաջանյանի շիրիմին, զորակցություն հայտնել Աղաջանյանների ընտանիքին, հարազատներին ու մտերիմներին:

Հովիկ Յուրիի Աղաջանյանը ծնվել է 1994 թվականի դեկտեմբերի 20-ին՝ Ասկերանի շրջանի Խնածախ գյուղում:

2012-2014թթ. ծառայել է ԱՀ ՊԲ շարքերում:

Սովորել է «Հայաստանի ազգային ագրարային համալսարան» հիմնադրամի Ստեփանակերտ մասնաճյուղի ԱՊՀ հաշվապահական հաշվառում մասնագիտությունը՝ հեռակա ուսուցմամբ:

2017 թվականի ծառայության է ընդունվել ԱԻՊԾ-ում:

2017 թվականի մայիսի 5-ին նշանակվել է փրկարար ուժերի վարչության հրշեջ փրկարար մասի վարորդ փրկարարի պաշտոնին:

Ամուսնացած չէր:

2020 թվականի սեպտեմբերի 27-ից Արցախի դեմ սկսված լայնածավալ մարտական գործողությունների ընթացքում՝ հոկտեմբերի 2-ին ադրբեջանական զինուժը թիրախավորել և «Սմերչ» համազարկային կրակի ռեակտիվ համակարգից հրթիռակոծել է նաև ԱՀ ՆԳՆ արտակարգ իրավիճակների պետական ծառայության վարչական տարածքը։
Մարմնական տարբեր աստիճանի վիրավորում ստացած Հովիկ Աղաջանյանի կյանքի համար երկու օր շարունակ պայքարեցին Ստեփանակերտի, ապա նաև Երևանի «Էրեբունի» բժշկական կենտրոնի բժիշկները:
Ցավոք, նրա կյանքը փրկել չհաջողվեց: Նա անմահացավ հոկտեմբերի 4-ին:
Հուղարկավորվել է հայրենի գյուղի հերոսների հուշահամալիրում:
Փրկարարական աշխատանքներում ցուցաբերած անձնական խիզախության համար՝ ԱՀ Նախագահի հրամանագրով՝ հետմահու պարգևատրվել է «Երախտագիտություն» մեդալով:
ՆԳ նախարար, գեներալ-մայոր Կարեն Սարգսյանի հրամանով՝ Հ.Աղաջանյանին շնորհվել է «Փառքի խաչ-Նոյ» հուշամեդալ: