Այս պահին գնալ բանակցությունների, կնշանակի՝ զիջել բավական լուրջ դիրքեր, վտանգներ առաջացնել Հայաստանի և Արցախի անվտանգության համար․ Ղազինյան

Ազգային ժողովի «Հայաստան» խմբակցության պատգամավոր Արթուր Ղազինյանն այս փուլում նպատակահարմար չի համարում Ադրբեջանի և Հայաստանի ղեկավարների հանդիպումը, քանի որ չեն կարող լինել բովանդակայն բանակցություններ։ Այդ մասին նա ասաց լրագրողների հետ զրույցում։

Պատգամավորի դիտարկմամաբ, Հայաստանը գտնվում է բավականին թույլ վիճակում, բանակցային դիրքերը բավական թուլացած են և հիմա գնալ բանակցությունների, կնշանակի՝ զիջել բավական լուրջ դիրքեր, նաև վտանգներ առաջացնել Հայաստանի և Արցախի անվտանգության և տարածքային ամբողջականության համար:

«Իհարկե, իշխանությունը որոշեց անել այլ բան․ հայտարարվեց, որ իշխանությունը բարձրագույն մակարդակով պատրաստ է հանդիպել Ադրբեջանի ղեկավարի հետ, եթե չեմ սխալվում, ասվեց, որ պատրաստ է տանել ականապատ տարածքների քարտեզները ու փոխանակել բոլոր գերիների հետ:

Սա ևս նոնսենս է, քանի որ գերիներին պետք էր վերադարձնել նոյեմբերի 10-ին, 11-ին, եռակողմ հայտարարության մեջ ամենակարևոր պահանջներից մեկն է, ինչը որ չի արել Ադրբեջանը և Հայաստանն ըստ հավուր պատշաճի հետևողական չի եղել, որպեսզի գերության մեջ պահվող, խոշտանգվող, սպանվող մեր քաղաքացիները, համաձայն ստորագրված պայմանագրի, վերադարձվեն: Հիմա ստացվում է, որ Ալիևը փորձում է մեզ վրա մի բան վաճառել, ինչը պարտավոր էր տալ առանց որևէ նախապայմանի»,- ասաց Ղազինյանը։

Նրա գնահատմամբ, Հայաստանի իշխանության գործողությունները հակասում են Հայաստանի ազգային և պետական շահին և նրանց գործողություններն ամեն օր վտանգ են ներկայացնում մեր պետության և ժողովրդի համար:

«Տեսել ենք Փաշինյանի վարած բանակցությունները երեք տարի, տեսել ենք, թե ինչի է հանգեցրել, ինչպես է փոշիացվել ու զրոյացվել 26 տարվա բանակցային ողջ կապիտալը, դա ինչ հետևանքներ է ունեցել: Ցավոք սրտի, պետք է արձանագրել, որ այսօրվա մեր իշխանությունն ունակ չէ բանակցություններ վարել»,-ասաց պատգամավորը։

Նրա խոսքով, այն ժամանակ ունեինք բավական շահեկան դիրքեր։

«Ի՞նչ ունենք մենք այսօր առաջարկելու: Կարծես թե՝ ոչ մի բան»,-ընդգծեց պատգամավորը։