Իմքայլական պատգամավորը Գորիս-Կապան ճանապարհի վրա ոչ մի խնդիր չի տեսել

ԱԺ «Իմ քայլը» խմբակցության պատգամավոր Արմեն Խաչատրյանը վստահեցնում է, որ գրեթե ամեն օր է անցնում Գորիս-Կապան ճանապարհով և ոչ մի խնդիր չի տեսել։

«Առավելագույն ժամկետը, որ եղել է, 15 րոպե է եղել, որ սպասել ենք»,-լրագրողների հետ զրույցում ասաց սյունեցի պատգամավորը՝ հավելելով, որ Որոտանի հատվածում գերի ընկնելու մտավախություն չունի։

«Գորիս-Կապան ճանապարհի Որոտանի հատվածում՝ Ադրբեջանի վերահսկողության տակ ընկած այդ հատվածում, իրենք անցակետ են տեղադրել, և այդ անցակետի անցումն իրականացվում է Ռուսաստանի և Հայաստանի սահմանապահ զորքերի ուղեկցությամբ։ Այո, դա որոշակի խոչընդոտ է երթևեկությանը, և որոշ ժամանակ՝ 10-15 րոպե, գուցե 5 րոպե, վարորդները ստիպված են լինում սպասել», -ասաց Արմեն Խաչատրյանը։

Իմքայլական պատգամավորը նկատեց, որ այդ տարածքը «ադրբեջանական վերահսկողության տակ է անցել», քանի որ ԽՍՀՄ նախանշած սահմաններով այդ հատվածը արդրբեջանցիների վերահսկողության տակ եղած սահմանն է եղել։

Հարցին, թե ինչու՞ մինչև հիմա այդ հատվածն ադրբեջանցիները չէր, և միայն այժմ է «դարձել» ադրբեջանցիներինը, Խաչատրյանը չպատասխանեց և հորդորեց «նորմալ, գործնական» հարցեր տալ։

Դիտարկմանը, որ Ադրբեջանի նախագահը, այդ մասին խոսելիս, հղում է անում ՀՀ իշխանություններին, որի որոշ ներկայացուցիչներ պարբերաբար բարձրաձայն հայտարարում են, թե Գորիս-Կապան ճանապարհի Որոտանի հատվածն «ադրբեջանական» է, իշխանությունը ներկայացնող պատգամավորը արձագանքեց, թե Ալիևը հղում է անում հայ լրագրողներին։

«Ալիևն ամենից շատ ձեր հրապարակումներին է հղում անում»,- ասաց Խաչատրյանն ու հեռացավ։