Հոկտեմբերի 2-ին 4 զինծառայող այրվածքներով տեղափոխվել է վերակենդանացման բաժանմունք․ ՊՆ-ն շարունակում է լռել

Տարբեր աստիճանի այրվածքներով Սոթքից Երևանի Այրվածքաբանության ազգային կենտրոն ՓԲԸ են տեղափոխվել 4 զինվոր։ Այս մասին շրջանառվող լուրը NEWSPRESS.am-ի հետ զրույցում հաստատեց կենտրոնի ընդունարանի հերթապահ բուժաշխատողը։

Նա ինքն է հոկտեմբերի 2-ին՝ ժամը 1:45 ընդունել զինվորներին։ Բուժաշխատողը նշեց, որ տղաներին անմիջապես տեղափոխել են վերակենդանացման բաժանմունք և տվեց այդ բաժանմունքի համարը, որպեսզի կարողանանաք տեղեկություն ստանալ նրանց վիճակի մասին։ Սակայն այստեղ, բուժաշխատողներից մեկը, ագրեսիվ տոնով նկատեց, որ տղաներն իրենց մոտ չեն։

«Եթե տղաներին արդեն տեղափոխել են վիրաբուժական բաժանմունք ու մեր մոտ չեն, ես որտեղի՞ց կարող եմ իմանալ, թե ոնց են»,- ասաց նա։

Դիտարկմանը, որ ձեր համարն են տվել, բուժաշխատողն արձագանքեց․ «Դե հա, ես ընդունարանի աշխատողի վրա եմ զայրացած, որ մեր համարն են տվել, իրենցից հարցրեք վիրաբուժական բաժանմունք»։

Ընդունարանի աշխատակցուհին բաժանմունքի համար չտվեց՝ նշելով, որ բաժանմունքում հեռախոսահամար չկա և ընդգծեց, որ ինքն արդեն 3 օր է՝ հերթափոխում չի եղել և չի իմացել, որ տղաներին վերակենդանացման բաժանմունքից արդեն տեղափոխել են։

Ովքեր են զինվորները, և ինչ է իրականում տեղի ունեցել՝ փորձեցինք պարզել Սոթքի համայնքապետ Հակոբ Ավետյանից։

Նա ևս հաստատեց, որ նման դեպք տեղի է ունեցել, սակայն մանրամասներին չի տիրապետում։

Դիտարկմանը, թե ըստ շրջանառվող լուրերի՝ հրդեհվել է տնակ, որտեղ եղել են զինվորները, համայնքապետը նկատեց․ «Ես տեղյակ եմ, որ նման դեպք տեղի է ունեցել, բայց անկեղծ՝ մանրամասներին չեմ տիրապետում։ Հնարավոր է՝ այդ վարկածը ճիշտ չլինի։ Տղաների մասին մանրամասներ չեմ իմացել, քանի որ ասացին, որ տղաների վիճակն արդեն նորմալ է»,- ասաց համայնքապետը։

Նա նաև տեղյակ չէր՝ ժամկետայի՞ն զինծառայողներ են, թե՞ պայմանագրային։

Ավետյանից հետաքրքրվեցինք նաև Սոթքում տիրող սահմանային իրավիճակի մասին։ Նա նշեց, որ այս պահին հանգիստ է սահմանին։

«Կարող է մեկ-երկու կրակոց լինի օդում, բայց հանգիստ է։ Սահմանային միջադեպեր չունենք»,- ասաց Հակոբ Ավետյանը։

Ինչ վերաբերում է Պաշտպանության նախարարությանը, ապա զինվորների հետ տեղի ունեցած միջադեպն այնտեղից ոչ մի կերպ չմեկնաբանեցին։

Փաստն այն է, որ այս պահին զինվորները գտնվում են Այրվածքաբանական կենտրոնում, և նրանց կյանքին վտանգ չի սպառնում

Արմինե Մկրտումյան