Իշխանությունը, թշնամուն հանգստացնելու համար, իր հայտարարություններով փորձում է ցույց տալ, որ ամեն ինչ շարունակում է պայմանավորվածության համաձայն․ Աննա Մկրտչյան (տեսանյութ)

Այս պահին, Հայաստանում ոչ միայն անվտանգային համակարգ չկա, այլև մարդ չկա, ով ուզում է երկրի անվտանգություն պահպանել։ Այս մասին լրագրողների հետ ճեպազրույցում ասաց «Պատիվ ունեմ» խմբակցության պատգամավոր Աննա Մկրտչյանը:

Նա նկատում է, որ Նիկոլ Փաշինյանը շարունակում է կյանքի կոչել Ադրբեջանին տրված ու տրվելիք խոստումները՝ հակայակական քայլերը։ Պատգամավորի խոսքով, իրենց ամեն անգամ սաստում են՝ ասելով, թե չափազանցնում են սահմանում տիրող իրավիճակի նկարագրությունը։

«Ի՞նչ չափազանցման մասին է խոսքը, եթե այսօր միջպետական ճանապարհը զավթված է, իսկ իշխանությունները փորձում են դա ներկայացնել սահմանային փոքրիկ միջադեպ։ Իրական իրավիճակի մասին էլ իմանում ենք թշնամի երկրի տրամադրած տեղեկատվությունից, քանի որ մեր կառավարությունը մեզ ոչ մի պաշտոնական տեղեկատվություն չի տրամադրում։ Սա խայտարակություն է»,-ասաց պատգամավորը։

Նա հիշեցրեց, որ Փաշինյանը իրավիճակի մասին չխոսեց նաև ՄԱԿ-ի ամբիոնից, երբ պետք է ներկայացներ վիճակն ու ասեր, որ հայկական պետականության դեմ ահաբերչություններ են տեղի ունեցել։

«Պետք է ասեր, որ ահաբեկչական պատերազմը սանձազերծել են մի քանի պետությունները։Կհիշեք, որ խոսվում էր մի քանի պետությունների ու օտարերկյա սպառազինության մասին։ Նա նույնիսկ այդ գործիքները չցանկացավ օգտագործել՝ միջազգային հանրության ուծադրությունը գրավելու համար»,-նկատում է Աննա Մկրտչյանը։

Նրա դիտարկմամբ, իշխանության բոլոր հայտարարությունները ուղղված են ոչ միայն ներքին լսրանանին, այլև հերթական անգամ Թուրքիային ու Ադրբեջանին հանգստացնելու համար, փորձում են համոզել, թե մի անհանգստացեք, մենք ամեն ինչ անում ենք մեր պայմանավորվածության համաձայն։