Մենք ամեն ինչ կանենք, որ պատվաստումը հարկադիր չլինի, իսկ ՊՇՌ թեստը լինի պետության հաշվին․ ի՞նչ 10, 15 կամ թեկուզ 5 հազար դրամ, այն շատ չնչին է․ Արամ Վարդևանյան

ԱԺ «Հայաստան» խմբակցությունը Սահմանադրական դատարան է ներկայացրել Առողջապահության նախարարի հայտնի հրամանի բողոքարկումը, որով պարտադրվում է քաղաքացիներին պատվաստվել կամ ամիսը 2 անգամ թեստավորվել։ Այս մասին լրագրողների հետ ճեպազրույցում ասաց խմբակցության պատգամավոր Արամ Վարդևանյանը։ 

Նրա դիտարկմամբ՝ սոցիալական-տնտեսական այս ծանր պայմաններում չի նախատեսվում նման տիպի անհամաչափ բեռ դնել մեր հայրենակիցների վրա։

«Խնդիրն այն է, որ դա արվում է քաղաքացիների հաշվին։ Եվրոպական շատ երկրկներում է դրվել այդ մոդելը, բայց մեկ տարբերությամբ՝ այդ ծախսը անում է պետությունը։ Այսինքն՝ իմանալով, որ մեր հայրենակիցներն ունենալով սոցիալական ծանր պայմաններ, նորմալ չէ, որ մի հատ էլ իրեն հարկադրես, թե կա՛մ գնա, քո աշխատավարձը մի ստացիր ու թեստավորվիր, կա՛մ, որպես այլընտրանք, գնա և պատվաստվիր․ սա դառնում է հարկադրանք»,- նկատում է Արամ Վարդևանյանը։ 

Նրա հայտարարում է, որ «Հայաստան» խմբակցությունը կողմ է պատվաստմանը, բայց այն չպետք է պարտադրվի։

«Այդ ինչպես է ստացվում, որ թշնամուն՝ թշնամի չասող իշխանությանը վստահության մանդատ տված ժողովուրդն այսօր չի վստահում այդ նույն իշխանությանը՝ պատվաստվելու  հետ կապված»,- նկատում է Արամ Վարդևանյանը՝ հավելելով, որ այն վստահության մակարդակը, որն իշխանությունն անընդհատ փորձում է ցույց տալ, այլևս չունի։

Բացի այդ, պատգամավորի համոզմամբ, չկա կոմունիկացիոն ճիշտ ռազմավարություն քաղաքացիների հետ․ նրանց չի ներկայացվում, թե կոնկրետ ինչի համար է անհրաժեշտ պատվաստումը։

Արամ Վարդևանյանն ուսումնասիրել է տարբեր իրավիճակներ տարբեր երկներում և պարզել, որ երբևէ ոչ մի երկրում չեն ստիպել հասարակությանը պատվաստվել, այլ ճիշտ աշխատանք են տարել նրանց հետ՝ բացատրելով, թե ինչու է անհրաժեշտ պատվաստվելը։

Մինչդեռ հայկական իրականության մեջ մարդկանց հետ խոսում են «կալանավորել, ձերբակալել» սպառնալիքներով․․․

«Մենք մեր կողմից ամեն ինչ կանենք, որ հարկադիր չլինի պատվաստումը, իսկ թեստավորումը լինի պետության հաշվին, հատկապես որ այն շատ չնչին գումար է․ ի՞նչ 10, 15 կամ թեկուզ 5 հազար դրամի մասին է խոսքը, այդ գումարը շատ ավելի չնչին է»,-նկատում է Արամ Վարդևանյանը, ում դիտարկմամբ, թեստավորումը դարձել է պետության բիզնեսը։