Սրանց հեռացումը պետք է լինի ցանկացած գիտակից հայ մարդու գլխավոր նպատակը. մնացած խաղերը ժամանակի անիմաստ կորուստ է, իրական օրակարգերից շեղում. Սաղաթելյան

Մենք միայն ուրախ կլինենք, եթե արտախորհրդարանական ուժերը խորհրդարանից դուրս պայքարի օրակարգեր ձևավորեն (ինչպես դա ժամանակին անում էինք մենք)։ Մենք ոչ միայն կողջունենք դա, այլև լիարժեք կհամագործակցենք այդ ուժերի և անհատների հետ։ Այս մասին ֆեյսբուքյան իր էջում գրել է «Հայաստան» դաշինքի պատգամավոր, ԱԺ փոխխոսնակ Իշխան Սաղաթելյանը: 

«Այսօր կան բազմաթիվ քաղաքական և հասարակական արժանի գործիչներ, ովքեր խորհրդարանում չեն, բայց անկեղծ և իրական պայքարի մեջ են այս չարիքի կառավարության դեմ։ Բայց կան նաև ուժեր և անհատներ, ովքեր քաղաքական դաշտում ոտատեղ ունենալու համար իրենց պարտքն են համարում վարկաբեկել կամ նսեմացնել խորհրդարանական ընդդիմության գործունեությունը՝ չհասկանալով դասագրքային մի պարզ ճշմարտություն.

կա'մ իշխանություն ես, կա'մ ընդդիմություն, դրանց մեջտեղում լինելը լավ կարգավիճակ չԷ, դրա վերջը լուսանցքն է։

Մենք բաց ենք բոլոր իրական ընդդիմադիր ուժերի և անհատների հետ լայն համագործակցության, միշտ պատրաստ ենք լսել և՛ քննադատություն, և՛ առաջարկներ, պատրաստ ենք միասին պայքարել և' խորհրդարանում, և' խորհրդարանից դուրս:
Պատրաստ ենք միասնաբար ազգային դիմադրության օրակարգ ձևավորելու, ուժերը մեկտեղելու և Հայաստանի թուրքացումը կանխելու ուղղությամբ հանդես գալ միասնական ճակատով։

Քանի դեռ այս իշխանությունը կա, Հայաստանի պետականությունը վտանգված է, ուստի սրանց հեռացումը պետք է լինի ցանկացած գիտակից հայ մարդու գլխավոր նպատակը։
Ուժերի համախմբումը և Ազգային դիմադրության ձևավորումը կենսական անհրաժեշտություն է... իսկ մնացած խաղերը ժամանակի անիմաստ կորուստ է, իրական օրակարգերից շեղում....»,- գրել է նա: