Եթե Արցախի կարգավիճակի հարցը չլուծվի, ապա այնտեղ հայ չի մնա․ հադրութցիները կառավարության դիմաց են (տեսանյութ)

Ամեն անգամ մեզ կառավարությունից ներս են հրավիրում, խոստումներ տալիս, մենք էլ դուսր ենք գալիս մարդկանց ենք խոստանում ու ամեն ինչ սուտ է դուրս գալիս։ Այս մասին լրագրողների հետ զրույցում ասաց Հադրութից տեղահանված բնակիչ, «Հանուն Հադրութի» նախաձեռնության անդամ Լևոն Հայրյանը։

Նա Արցախից տեղահանված քաղաքացիների հետ կառավարության մոտ էր։

Նրանք դժգոհում են, որ մինչև հիմա չունեն կարգավիճակ և իրենց հարցը օդից կախված է։ Մեկ շնչին նախկին 68 000 դրամ ամսական օգնության դիմաց էլ կառավարությունն արդեն 25000 է տալիս։

«Ասում են՝ ամսական 25 հազար դրամ ենք տալիս ու որոշում են, թե ինչպես պետք է ծախսենք։ Ասել են՝ կումունալն ու տան վարձերը կտաք, մի քիչ էլ հետ կգցեք»,-նշեց Լևոն Հայրյանը։

Դիտարկմանը, թե աշխատանքի և սոցիալական ապահովության հարցերի նախարարությունը հայտարարել է, թե հադրութցիների համար Արցախում տներ է կառուցում ու առաջարկել է նրանց տեղափոխվել Արցախ, քաղաքացին պատասխանեց, որ այսօր այնտեղ ապահով չէ։

«Արցախը մեզ կգայթակղի, եթե այնտեղ սկսվի ազգային ազատագրական պայքար։ Եթե չկա պայքար ու Արցախի ստատուս քվոյի հարցը լուծված չէ, ապա Արցախում հայ չի մնալու»,-ընդգծեց Հադրութի բնակիչը։

Նա նկատում է, որ եթե բնակչությանը ուզում են Արցախ տանել, ապա պետք է այնտեղ ձգող որևէ բան անեն․ «Ուր են տանում, ինչու են տանում, ինչ ապագա է մեզ այնտեղ սպասվում, եթե Ադրբեջանը ասում է դա իր տարածքն է, Ռուսաստանը Արցախը ճանաչում է Ադրբեջանի ամբողջականության մեջ, իսկ Հայաստանում տեր չեն կանգնում կարգավիճակին»,-նշեց մեր զրուցակիցը։