Կարծում եմ՝ դատական ​​ակտը արդեն գրված ունեն, բայց մենք հաստատ իրենց ջրաղացին ջուր չենք լցնելու և շարունակելու ենք Արմեն Գևորգյանի պաշտպանությունը․ փաստաբան (տեսանյութ)

Իրականում շատ վիրավորական է: Իմ 25 տարվա պրակտիկայի մեջ նման երևույթի երբեք չեմ հանդիպել։ Այս մասին լրագրողների հետ զրույցում ասաց նախկին փոխվարչապետ, այժմ պատգամավոր Արմեն Գևորգյանի փաստաբան Լուսինե Սահակյանը, այն բանից հետո, երբ դատավոր Աննա Դանիբեկյանի գործողություններից վրդովված լքեց դատական նիստերի դահլիճը։

Նրա համոզմամբ՝ դատարանը չի միտք չունի արդարադատություն իրականացնելու։ «Դատարանն իր առջև միայն մի խնդիր է դրել, որ ինքը պետք է անցնի առաջ։ Եվ ինքը այդ խնդիրը լուծելու ճանապարհին ոչ մի բանի առաջ կանգ չի առնում»,-նկատում է փաստաբանը։

Նա ընդգծում է, որ դատարանի կողմից կիրառված պատժամիջոցն ակնհայտ անօրինական են և միևնույն ժամանակ վստահեցնում է, որ ոչ մի պատժամիջոցով չեն կարող կանգնեցնել պաշտպանական կողմին։

Լուսինե Սահակյանը նաև հերքեց Դատախազությունից ստացված այն տեղեկատվությունը, թե իբր ինքը հետաքրքրված չէ և չի փորձել ստանալ և ծանոթանալ նյութերին։ Նա շեշտեց, որ Դատախազությունից իրեն տրամադրել են ընդամենը 50 թերթ, որը ինքն անմիջապես գնացել և վերցրել է։ 

Թե ինչու են Դատախազությունից նման բան ասել, Լուսինե Սահակյանը կռահում է և ափսոսանք է հայտնում՝ դատախազի դիրքորոշման համար։

«Նրա առջև ևս խնդիր է դրված հասնել վերջնական դատական ​​ակտի: Կարծում եմ՝ այն արդեն գրված ունեն։ Մենք հաստատ իրենց ջրաղացին ջուր չենք լցնելու և շարունակելու ենք պաշտպանություն իրականացնել։ Աննա Դանիբեկյանը պարտավոր է տրամադրել նյութերը՝ և կանի դա: Նա պարտավոր է ժամանակ տրամադրել, և նա դա կանի: Դատարանը մեկ նպատակ ունի՝ անօրինական դատական ​​ակտի ընդունումը: Մենք նրան չենք օգնի: Թող որքան ուզում է պատժամիջոցներ կիրառի»,- ասաց Լուսինե Սահակյանը։

Մանրամասները՝ տեսանյութում