Սահմանագծի Սոթք-Խոզնավար հատվածում ադրբեջանցիները հետքայլ կատարելու մտադրություն չունեն. Տիգրան Աբրահամյան

Սահմանային այն հատվածը՝ Սոթք-Խոզնավար, որտեղ փորձում է որոշակի դիտարկումներ իրականացնել, մայիսի 12-ից հետո ադրբեջանական զորքերի կողմից, ըստ էության, բռնազավթվել է, նույնիսկ պաշտոնական տեղեկություններով մինչև 3.8 կմ խորությամբ ադրբեջանական ներխուժման փաստ կա: Այս մասին լրագրողների հետ զրույցում ասաց  «Պատիվ ունեմ» խմբակցության պատգամավոր, անվտանգության հարցերով փորձագետ Տիգրան Աբրահամյանը:

«Ադրբեջանական զորքերն ամենատարբեր ուղղություններով ներխուժել են Հայաստանի տարածք, դրանից հետո նոր ՀՀ Զինված ուժերը համապատասխան ուժեր են այդ հատվածում տեղակայել, որոնք պետք է ապահովեն սահմանային այդ հատվածի պահպանությունը, պաշտպանությունը, ըստ անհրաժեշտության իրականացնեն պլանային գործողությունները, որոնք տարբեր իրավիճակների համար նախատեսված են»,- ասաց նա:

Տիգրան Աբրահամյանը նկատեց, որ փաստացի մայիսին թույլատրվել է ադրբեջանական զորքերի ներխուժումը ՀՀ տարածք և մինչև այսօր ռազմաքաղաքական ղեկավարությունից որևէ մեկը դրա համար պատասխանատվություն չի կրել:

«Այս բացը մնում է և ինքնին բերում է նոր եզրահանգումների, որ կամ այդ տարածքները հանձնելու պայմանավորվածություն կար կամ հանցագործություն է տեղի ունեցել և սահմանային բավականին մեծ հատված ուղղակի պաշտպանության տակ չի առնվել»,- ասաց Աբրահամյանը:

Նա նշեց, որ այդ հատվածում ադրբեջանական կողմը բավականին ամրանում է, ինժեներական աշխատանքներ է իրականացնում, ինչը ցույց է տալիս, որ Ադրբեջանը մտադրություն չունի հետքայլ կատարել այդ տարածքներից:

«Տարբեր աղբյուրներից ես բազմաթիվ տեղեկություններ եմ ստանում, բայց այս թեմայի հետ կապված խոսում եմ իմ տիրապետած տեղեկությունների 5 տոկոսի ծավալով, մի մասը անվտանգության տեսանկյունից չեմ հրապարակում: Բայց, հույս ունեմ, իշխանություններն իմ պարկեշտությունից չեն օգտվի և իրենց այսպիսի լկտի ձևով չեն պահի: Ժամանակ եմ տվել ինձ պատասխանելու համար: Իմ խնդիրն իրականում ոչ թե ինչ-որ մեկին անվանարկելն է, քննադատելը, այլ եղած պրոբլեմների լուծումն է»,- ասաց Տիգրան Աբրահամյանը:

Նա ընդգծեց, որ մի քանի օր ժամանակ է տվել Զինված ուժերի Գլխավոր շտաբին` իրավիճակին պատշաճ արձագանքելու և սահմանային այդ հատված իր մուտքը թույլատրելու համար: