«Ադրբեջանցիները գլուխը պատով են տալիս». պահանջում են ցրել բանակը. տեղահանված քաղաքացին` իր ու Արայիկ Հարությունյանի տհաճ խոսակցության մասին (VIDEO)

Մեկ հիմնական խնդիր կար պետության առջև` արցախցիներին ապահովել կացարանով, սակայն մենք տեսանք եղած սուղ միջոցների փոշիացում։ Այս մասին ասաց «Շուշիից բռնի տեղահանված հայ բնակչություն» ՀԿ խորհրդի անդամ Աշոտ Հարությունյանը` Հայաստանի Ազգային ժողովում Ղարաբաղից հարկադիր վերաբնակների հիմնախնդիրների քննարկման ժամանակ:

Նա նկատեց, որ առաջարկել են տեղադրել ֆիննական տնակներ, որտեղ կբնակեցնեին արցախցիներին։

«Արցախում ինչ֊ինչ ուժեր իրենց հայրենասերի տեղ են դրել ու ասում են` եկեք, բնակվեք։
Էհ, գնացել ենք, բայց Էդ ովքե՞ր են, ինչի են տենց թանկ գնե՞ր դնել, ի՞նչ փողեր են լվանում, դա պետք է պարզել»,- ասաց Հարությունյանն ու նկատեց, որ մինչ օրս չեն պատժվել նաև պատերազմի ու պարտության մեղավորները։

Աշոտ Հարությունյանին նաև վրդովվեցրել է Արցախի նախագահ Արայիկ Հարությունյանի հայտարարությունը, թե մտադիր է ցրել բանակը, քանի որ Ադրբեջանը պահանջում է։

«Ադրբեջանցիները շատ բան են անում, գլուխը պատով են տալիս: Դու պետք է պահես մեր բանակը: Եվ, այո, մեր ներկայացուցիչները պահանջում են անհապաղ ճանաչել ԼՂՀ միջանկյալ կարգավիճակը: Այո, շատերը սա վաղաժամ են համարում: Նույնիսկ Եվրոպայից եկած ընկերներս են ինձ զանգահարում և խնդրում չբարձրացնել այս հարցը: Այնուամենայնիվ, ես անընդհատ ասում եմ, որ այս հարցը մեզ համար շատ կարևոր է»,- ասաց Հարությունյանը:

Նա նկատեց, որ եթե Հայաստանի իշխանությունները ժամանակին ճանաչեին Ղարաբաղի անկախությունը, ապա Ադրբեջանի հետ պատերազմից հնարավոր կլիներ խուսափել: