Ստվերային որոշակի երևույթներ են տեղի ունենում. Սեյրան Օհանյանը՝ սահմանային իրավիճակի մասին (տեսանյութ)
Ակնհայտ է, որ տարածաշրջանային իրադարձությունների համատեքստում այսօր Հայաստանն ու Արցախը հայտնվել են մի իրավիճակում, որ շարունակական են աշխարհի ուժային կենտրոնների շահերի բախումները մեր տարածաշրջանում և նաև տարածաշրջանային դերակատարների մուտքն է թույլ տրվել Հարավային Կովկաս։ Այս մասին այսօր «Հայաստանին և Արցախին սպառնացող վտանգներն ու դրանց հաղթահարման ուղիները» խորագրով կլոր սեղանի ժամանակ ասաց ԱԺ «Հայաստան» խմբակցության ղեկավար, պաշտպանության նախկին նախարար Սեյրան Օհանյանը:
«Թուրք-ադրբեջանական տանդեմի ձեռնարկած սադրանքի արդյունքում մենք հայտնվել ենք այսպիսի դժվարին իրավիճակում։ Այս մեկ տարվա ընթացքում լիարժեք գնահատական չի տրվել իրավիճակին, և իրավիճակի ոչ ճիշտ դիագնոզն է, որ անորոշություն է բերում Հայաստանի և Արցախիի հեռանկարի համար։ Այստեղ հավաքվել ենք, որպեսզի այդ գնահատականը տանք և այդ գնահատականի արդյունքում որոշումներ ընդունենք»,- ասաց Օհանյանը։
Նրա խոսքով՝ իրենց համար ակնհայտ են պատերազմի և՛ պատճառները, և՛ հետևանքները։
«Բայց պատերազմի հետ ցավալի է նաև այն երևույթը, որ շարունակական է դարձրել Հայաստանի և Արցախի համար պարտությունների և անհաջողությունների շարանը, որոնք արդեն գտնվում են ՀՀ տարածքում, Ադրբեջանի հետ շփման գծում։ Այս ամենը բերում է նրան, որ և՛ ակնհայտ, և՛ ստվերային որոշակի երևույթներ են տեղի ունենում, որոնց կանխարգելմանը պետք է ուղղված լինի մեր ընդհանուր աշխատանքը։ Մեր այս միջոցառումների առանցքում դրված է մեկ նպատակ՝ ազգային դիմադրողականության ստեղծումը և նաև այն, ինչ մենք նկատում ենք հետևյալ կարգախոսի ներքո մեր գործունեության ծավալումը․ «Ոչ Հայաստանի թրքացմանը» և «Ոչ Արցախի հայաթափմանը»,- ասաց պատգամավորը։
Ըստ նրա՝ ակնհայտ է, որ Հայաստանն ու Արցախի միասին մեկ գործոն են, ավելի ամուր՝ և՛ անվտանգային առումով, և՛ նաև նախկինում ընդհանուր պաշտապանական համակարգի ձևավորված լինելու առումով, և՛ տնտեսական, միջպետական, պատմշակութային համագործակցության և միասնականության առումով։
«Այսօր մենք հայտնվել ենք այլ իրավիճակում՝ ավելի վտանգավոր, և մարտահրավերներն ու սպառնալիքներն այնքան հզոր են, որ անվտանգության միջավայրն ավելի փխրուն է դարձել մեր շուրջը»,- նկատեց Օհանյանը։
