Իշխանությունը թաքցնելու բան ունի. Տիգրան Աբրահամյանը՝ առաջնագծում տիրրող իրավիճակի մասին

Իշխանությունն ամեն կերպ փորձում է քողարկել սահմանագծում առկա իրական իրավիճակն ու քողարկել իր կողմից որևէ լուրջ քայլ չանելու գլխավոր պրոցեսը: Այս մասին ասուլիսի ժամանակ ասաց ԱԺ «Պատիվ ունեմ» խմբակցության պատգամավոր, անվտանգության հարցերով փորձագետ Տիգրան Աբրահամյանը՝ շեշտելով, որ Հայաստանի ու Արցախի շուրջ ստեղծված իրավիճակն ավելին է, քան մտահոգությունը:

Այն, որ իշխանությունը թաքցնելու բան ունի՝ Տիգրան Աբրահամյանի համար ակնհայտ է: Նրան այդպես մտածելու տեղիք է տվել այն փաստը, որ իշխանությունը որևէ ձևով չի ուզում, որ ընդդիմադիր պատգամավորները ֆիքսեն սահմանին առկա իրական իրավիճակը:

«Նրանք ամեն գնով տապալում են խորհրդարանական ընդդիմության բարձրաձայնած քննարկումների վերաբերյալ հարցերը, այլ նաև սահմանափակումներ են մտցնում նույնիսկ պաշտպանության և անվտանգության հանձնաժողովի անդամի առաջնագիծ այցելելու համար»,-ասաց Տիգրան Աբրահամյանը՝ հավելելով, որ սահմանազատման հետ կապված բարդագույն իրավիճակ է։

Նրա դիտարկմամբ, Հայաստանը միանգամից փորձում է միջազգային հանրությանն ու  բոլոր շահագրգիռ կողմերին տեղեկացնել, որ ինքը շահագրգռված է դելիմիտացիայի գործընթացով, ընդհուպ, հղում է անում խորհրդային քարտեզներին, որի հիման վրա պետք է տեղի ունենան այդ գործընթացները, ինչը մտահոգիչ է:

«Իշխանության հրատապ այս քայլերի իրականացումը, շտապողականությունը բավականին հարցեր է առաջացրել այս իրավիճակում»,-ասաց նա։

Միաժամանակ անվտանգության հարցերով փորձագետը նշեց, որ դելիմիտացիան բավականին երկար գործընթաց է ու կարող է Հայաստանը մտնի մի գործընթացի մեջ, որը հետագա տասնամյակներին բավականին վտանգավոր իրավիճակի բերել Հայաստանին՝ անկախ նրանից, թե այդ պահին ով կլինի իշխանության:

«Հայաստանի ու Արցախի շուրջ տեղի ունեցող գործընթացները պետք է լինեն ընդհանուր մեկ փաթեթով: Շատ բան կախված է, թե ինչ փաստաթուղթ կունենանք վերջում:

​Ցանկացած գործընթաց, որը Հայաստանի ու Արցախի շուրջ է տեղի ունենում, պետք է հաշվի առնել շատ կարևոր հանգամանք՝ Արցախի կարգավիճակի հստակեցումը, որի հիմքում պետք է լինի ինքնորոշման իրավունքի իրացման հարցը ու դրա միջազգային ճանաչման հարցը», - ասաց Տիգրան Աբրահամյանը: