ԼՂ շրջակայքի տարածքները պետք է ետ վերադարձվեն. Ադրբեջանի ԱԳՆ

Այսօր Ադրբեջանի արտգործնախարար Էլմար Մամեդյարովը լրագրողների հետ հանդիպման ժամանակ խոսել է դեկտեմբերի 19-ին Բեռնում նախագահների հանդիպման մասին: Այս մասին գրում է ադրբեջանական oxu.az կայքը: Մամեդյարովը տեղեկացրել է, որ Բեռնում քննարկվել են կառուցողական առաջարկներ և Ադրբեջանը տվել է իր համաձայնությունը` այդ առաջարկների ուղղությամբ բանակցություններ վարել:

Նա նշել է, որ Ադրբեջանը` որպես տարածքներ կորցրած, մեկ միլիոն փախստական ունեցող պետություն, պետք է արագորեն ճանապարհ գտնի խնդրի կարգավորման ուղղությամբ:

«Նախագահները ընդունել են ԵԱՀԿ Մինսկի խմբի շրջանակնրում Ռուսաստանի արտգործնախարար Սերգեյ Լավրովի առաջարկությունները խնդրի կարգավորման համար: Այդ առաջարկությունները ընդունելի են նաև ԵԱՀԿ մյուս կողմերի համար ևս: Առաջարկությունների հիմքում ընկած են 2014 թվականի ընթացքում Սերգեյ Լավրովի Հայաստան և Ադրբեջան կատարած այցի ընթացքում հնչեցրած մտքերը: ԵԱՀԿ Մինսկի խմբի շրջանակներում հակամարտության խաղաղ կարգավորմանն ուղղված Ռուսաստանի քայլերը բարձր են գնահատվում:
Առաջարկությունները մինչև 2014 թվականը Սոչիում, Նյու-Պորտում և Փարիզում հնչեցված Մադրիդյան սկզբունքների նորացված տարբերակներն են: 6 մասից բաղկացած Մադրիդյան նորացված սկզբմունքները հասարակությանը մեծամասամբ հայտնի են: Այստեղ Լեռնային Ղարաբաղի շրջակայքի «գրավված»տարածքների փուլ առ փուլ վերադարձը և դրանից բխող մյուս խնդիրներն են ներառված»,- հայտարարել է Մամեդյարովը: