Անիմաստ ծախսերից բյուջեն չի՞ ուզում ազատվել․ Աղվան Վարդանյանը՝ պարգևատրումների, խրախուսումների ու միջոցառումների ավելորդ ծախսերի մասին

ՀՀ նախագահ Արմեն Սարգսյանի՝ միայն արտասահմանյան գործուղումների համար նախատեսված է 425 միլիոն դրամ: Նկատի ունենալով նախագահի սահմանափակ լիազորությունները՝ այս գումարները մի քիչ շատ-շատ չե՞ն: Այս մասին ասաց ԱԺ «Հայաստան» խմբակցության պատգամավոր Աղվան Վարդանյանը՝ ԱԺ պետական-իրավական ու ֆինանսավարկային և բյուջետային հարցերի մշտական հանձնաժողովների համատեղ նիստի ժամանակ։

Պատգամավորն ասաց, թե և Ազգային ժողովում պարգևատրումների, դրամական խրախուսումների ու, ընդհանրապես, քաղաքացիական, դատական, պետական այլ ծառայողների գումարները կազմում են ընդհանուր աշխատավարձի գումարների մոտ 20-22 տոկոսը:

«Մենք շարունակելո՞ւ ենք այս նույն գործելաոճը՝ պարգևատրումները, խրախուսումները, հակասության մեջ մտնելով օրենսդրության հետ», - ասաց Աղվան Վարդանյանը։

Նրա խոսքով՝ Ազգային ժողովի ծախսերում ներքին գործուղումների համար նախատեսված է 235 հազար դրամ, իսկ արտասահմանյան գործուղումների համար՝ 648 միլիոն դրամ:

«ԱԺ հիմնական գործը, փաստորեն, ոչ թե Հայաստանում է, այլ՝ դրսում», - ընդգծեց Վարդանյանը:

Նա նաև չմոռացավ տարբեր բնույթի միջոցառումների մասին՝ ընդգծելով, որ մասնավորապես «Քաղաքացու օրը» նշելու համար հատկացվելու է 40 միլիոն դրամ:

«Անիմաստ ծախսերից բյուջեն չի՞ ուզում ազատվել», - իր հարցն իշխանության ներկայացուցիչներին ուղղեց ընդդիմադիր պատգամավորը:

Տիգրան Խաչատրյանն էլ ասաց, թե այն հարցերը, որոնք վերաբերում են ծրագրերին ու միջոցառումներին, դրանց պարզաբանումները կթողնի պատասխանատուների մեկնաբանությանը:

«Թե որքանով են այդ միջոցառումներն անհրաժեշտ ու արդյունավետ, դրանք համապատասխան ոլորտում լիազորված անձանց պատասխանատվության ու մեկնաբանությունների առարկան են», - ասաց նախարարը:

Նա վստահեցրեց, թե բոլոր հավելումները, պարգևավճարները հաշվարկված են օրենսդրությամբ սահմանված կարգով: