4 հազար զոհը ապագայում մոտ 6 հազար չծնված երեխա է․ Սուրեն Պարսյանը պատերազմի հետևանքով կրած կորուստներից առավել շատ կարևորում է հողն ու մարդուն
Պատերազմի հետևանքով չորս հազար զոհերը, հաշմանդամ դարձած մարդիկ, բացի բարոյական, հոգեբանական կողմից, սոցիալ-տնտեսական նշանակություն ունեցող կորուստներ են։ Այս մասին ասաց տնտեսագետ ուրեն Պարսյանը՝ Պատերազմի քննիչ հանձնաժողովի անհրաժեշտությունը. հետպատերազմյան ապաքինում» թեմայով քննարկման ժամանակ։
Նրա գնահատմամբ` պատերազմի հետևանքով Հայաստանի կրած կորուստներից առավել շատ կարևոր է հողն ու մարդը։
«Հայաստանում այդպես էլ չի գիտակցվել հողի տնտեսական բաղադրիչը։ Մարդիկ կարծել են, որ զիջելով հողը՝ ճանաչման, խաղաղության դիմաց, կունենաք այս կամ այն տնտեսական առավելությունը։ Հիմա փաստացի կա մի իրավիճակ, երբ չունենք այդ հողն ու չունենք տնտեսական հնարավորություններ՝ Հյուսիս-Հարավ, Արևելք-Արմուտք և այլ նախագծերի տեսքով»,-ասաց Սուրեն Պարսյանը։
Տնտեսագետի խոսքով` Հայաստանը զրկվել է այդ մարդկանց՝ զոհվածների, հաշմանդամություն ձեռք բերածների տնտեսական ներուժն ապագայում օգտագործելու հնարավորությունից։ Նա նկատում է, որ չորս հազար զոհը ապագայում մոտ վեց հազար չծնված երեխա է։
«Այսինքն, մենք մարդկային կորուստներ ունեցանք ոչ միայն հիմա, այլև՝ ապագայում։ Ես այս ամենն ասում եմ, որպեսզի պատկերացնենք, թե ինչ կորուստներ ենք ունեցել, ինչպես կարելի է այն լրացնել։ Մենք հիմա մի քանի անգամ ավելի շատ պետք է ուշադրություն դարձնենք ծնելիությանն ու ժողովրդագրության հարցերին»,-ասաց նա։
