Իմ սենյակում, այո, փակցված է Նիկոլ Փաշինյանի նկարը․ Ռոմանոս Պետրոսյան

Մարզպետներին այդպիսի հրահանգի մասին ես չեմ կարող որևէ մեկնաբանություն տալ, քանի որ տարածքային կառավարուն իմ ոլորտը չի, բայց իմ սենյակում, այո, փակցված է Նիկոլ Փաշինյանի նկարը։ Այս մասին այսօր լրագրողների հետ զրույցում ասաց Շրջակա միջավայրի նախարար Ռոմանոս Պետրոսյանը՝ պատասխանելով հարցին, թե մարզպետներին ևս հրահանգվե՞լ է աշխատասենյակներում Նիկոլ Փաշինյանի լուսանկարը փակցնել։

«Ես երևույթներին և քաղաքական գործընթացներին մեծապես վերաբերվում եմ ինստիտուցիոնալ տեսակետից։ Ինստիտուցիոնալ առումով, եթե կա նման որոշում, կարգ, ապա ինստիտուցիոնալ առումով ես՝ ոպես կաբինետի, կառավարության անդամ, գործադրում եմ այդ կարգը։ Բայց դա որևէ կերպ չի նսեմացնում այն գաղափարները, որ մենք տածել են ու շարունակում ենք տածել և բովանդակային առումով մեր գործունեության արդյունավետության վրա որևէ կերպ չի անդրադառնում»,- ասաց նախարարը։

Հարցին, թե այդ կարգը որտե՞ղ կարելի է փնտրել և գտնել, Պետրոսյանն ասաց, որ այդ մասին խոսել է վարչապետի աշխատակազմի ղեկավարը, և ինքը խնդրում է բավարարվել այդ մեկնաբանությամբ։

Ճշտող հարցին, թե այսինքն՝ նկարը կախելը չի՞ եղել իր անձնական որոշումը, նա ասաց, որ իր աշխատասենյակում ինքը հանդիսանում է պետական պաշտոնատար անձ և իր նախաձեռնողականությամբ, իր ճաշակով, իր անձնական մոտեցումներով չի առաջնորդվում։