«Մեր ու մանուկ պատասխան եք տալու»․ Փաշինյանից իշխանություն վերցնել պատրաստվող Մգեռը պարզաբանել է, որ նկատի է ունեցել Քոչարյանի աջակիցներին

Մգեռ Արմենիան ֆեյսբուքյան իր էջի եթերում պարզաբանում է ներկայացրել իր՝ «Մեր ու մանուկ պատասխան եք տալու» գրառման վերաբերյալ ու նշել, որ նկատի չի ունեցել ազգին։

«Որոշ քաղաքական շրջանակներ դա փորձեցին ուրիշ ձև ներկայացնել։ Ես ուզում եմ այդ խոսակցություններին վերջ տալ և ասել, որ այդ գրառումը վերաբերում էր Ռոբերտ Քոչարյանի ստրուկ աջակիցներին, որոնք մեր շարժման սկզբից փորձում են ամեն ինչ անել, որ մեր շարժումը ոչ մի ձև առաջ չգնա, որպեսզի մեր շուրջ չհամախմբվի հայ ազգ։ Ռոբերտ Քոչարյանի աջակիցներին, ստրուկներին, ովքեր սպասում են՝ երբ պետք է Քոչարյանի գրասենյակի ներկայացուցիչներն իրենց գումարներ բաժանեն, որպեսզի նրանք հավաքվեն, իրեն աջակցեն, ուզում եմ ասել հետևյալը՝ դուք ողորմելի եք, ուղղակի ամոթ է, դուք սուտի հայրենասերներ եք, դուք իրավունք չունեք կոչվել հայրենասեր, որովետև դուք աջակցում եք փողով։ Ձեր նպատակն է Ռոբերտ Քոչարյանից քերթել գումար, սուտի գոռաք, նրա ասածներն ընդունեք, իբրև թե դա իրականություն է։ Սա ուղղակի խայտառակություն է։ Ես զարմացած եմ, որ քաղաքական իրականության մեջ մարդիկ փողով են հայրենասիրություն ներկայացնում, փողով են գոռում՝ մենք հայ ենք, աջակցում են Ռոբերտ Քոչարյանին և պատրաստվում են գնալ նրա ցույցին, որը նոյեմբերի 8-ին է։ Ես ցավում եմ ձեզ համար, որովհետև դուք սուտ հայրենասերներ եք, դուք իրավունք չունեք կոչվեք հայրենասեր, դուք պարզապես հայ եք, որոնք փողի դիմաց պատրաստ եք ամեն ինչ անեք։ Եթե Ռոբերտ Քոչարյանը ձեզ գումար չվճարի, դուք հաստատ նրա կողքը չեք լինի»,- ասել է Մգեռը։

Հիշեցնենք, որ Մգեռը տարբեր ժամանակներում սատարել է գործող իշխանություններին, այդ թվում՝ Նիկոլ Փաշինյանին։ Պատերազմից ընդամենն ամիսներ Մգեռը հրապարակել էր Նիկոլ Փաշինյանի լուսանկարն ու գրել․ «․․․Հայաստանի նոր ղեկավարությունն անում է հնարավոր ամեն ինչ՝ արդարացնելու այն մարդկանց հավատն ու հույսը, ովքեր իրենց ձայնն են տվել իմ երկրի նոր ղեկավարության օգտին»։ Այսօր արդեն Մգեռ Արմենիան գալիս է վերցնելու իշխանությունը «Հայաստանի նոր ղեկավարությունից»։