Այն դպրոցները, որտեղ կլինեն տեղական բռնկումներ, կանցնեն հեռավար ուսուցման․ Անահիտ Ավանեսյան

Մենք երկար քննարկումներ են ունեցել, թե ինչպես պետք է մեկնարկենք ուսումնական տարին, որպեսզի տեղաշարժի կտրուկ աճ չունենանք: Այս մասին Ազգային ժողովում հայտարարեց Առողջապահության նախարար Անահիտ Ավանեսյանը ի պատասխան հարց, թե ինչու դպրոցները չեն անցնում, օրինակ, օրումեջ ուսուցման: 

«Համադրելով առողջապահական և կրթական ռիսկերը՝ ընտրեցինք թիրախային փակման միջոցը: Նախարարի հրամանով սահմանված է, որ այն դպրոցները, որտեղ դասարանի 10 տոկոսի չափ կունենանք դեպք կամ ընդհանուր դպրոցի ուսուցչական կազմի մեջ կունանանք որոշ դեպքեր, այդ դպրոցները կանցնեն հեռավար ուսուցման ռեժիմի»,- ասաց Ավանեսյանը:  

Նա նշեց, որ ժամանակագրական որևէ պատկերացում չունեն, թե երբ կավարտի համավարակը:

«Եթե նախորդ տարի կտրուկ լոքդաունները արդարացված էին և թույլ տվեցին մեզ առողջապահական համակարգը բերելու պատրաստվածության աստիճանի, դրանք անընդհատ պահպանելը երկարաժամկետ առումով  բավական վնասակար հետևանքներ է ունենում: ԱՀԿ-ն էլ իր ուղեցույցերի մեջ նշում է, որ դպրոցների փակման կամ կիսատ ռեժիմներով վարումը պետք է կարճ ընթացքներով իրականացնել, որովհետև մենք ունենք երեխաների թե՛ հոգեկան առողջության, թե՛ թերսնուցման և այլ մի շարք պրոբլեմներ»,- նշեց նախարարը՝ հավելելով, որ դպրոցների մեկ շաբաթ արձակուրդը ևս մեկ շաբաթով երկարաձգելը մի պահ հնարավություն է տվել մեղմելու և առողջապահական համակարգն այն վիճակում պահելու, որ հնարավորություն ունենան պացիենտներին ճիշտ ժամանակին բժշկական օգնություն տրամադրելու: 

«Այն դպրոցները, որտեղ կլինեն տեղական բռնկումներ, կգնանք հեռավար ուսուցման, թիրախային մոտեցում կկիրառվի»,- ասաց նախարարը:

Ինչ վերաբերում է հարցին, թե ինչու անցում չի կատարվում օրումեջյա ռեժիմի, Ավանեսյանն ասաց, որ դա վատ է անդրադառնում կրթական համակարգի վրա և ևս մեկ անգամ շեշտեց, որ լուծումը պատվաստվելն է: