Բաքուն հավատարիմ է եռակողմ հայտարարություններին և կատարել է դրանց բոլոր դրույթները. Բայրամով

Պաշտոնական Բաքուն հույս ունի, որ Երևանը կօգտագործի երկկողմ հարաբերությունները կարգավորելու բացառիկ հնարավորությունը, թուրքական A News հեռուստաալիքին տված հարցազրույցում ասել է Ադրբեջանի արտգործնախարար Ջեյհուն Բայրամովը։ «Հայաստանի արտգործնախարար Արարատ Միրզոյանի հետ Փարիզում կայացած բանակցություններում ես վերահաստատեցի մեր դիրքորոշումը, որը հետևյալն է՝ ադրբեջանական տարածքների և Ադրբեջանի միջազգային սահմանների ազատագրումից հետո լուծվեց հիմնարար խնդիրը՝ այժմ նախկին Լեռնային Ղարաբաղի հակամարտությունը։

Դրանից հետո մենք կարծում ենք, որ Հայաստանի և Ադրբեջանի միջև հարաբերությունները կարգավորելու բացառիկ հնարավորություն կա»,- ասել է նախարարը։ Բայրամովը, խոսելով Ղարաբաղի վերաբերյալ եռակողմ հայտարարության դրույթների կարևորության մասին, նշել է, որ դրանց լիարժեք իրականացումը կհանգեցնի ավելի լավ մթնոլորտի ստեղծմանը, փոխվստահության բարձրացմանը և տարածաշրջանում ընդհանուր իրավիճակի կայունացմանը։ «Բաքուն հավատարիմ է եռակողմ հայտարարություններին և կատարել է դրանց բոլոր դրույթները՝ կապված Ադրբեջանի հետ, և, իհարկե, մենք նույնն ենք ակնկալում Հայաստանից։ Շատ հարցեր արդեն լուծված են, բայց չլուծվածները դեռ մնում են։ Ցավոք սրտի, դրանց մի մասը Հայաստանի կողմից դեռ չի լուծվել։

Մեր ուղերձն այն է, որ բոլորը պետք է լրջորեն վերաբերվեն եռակողմ հայտարարություններին։ Երկրների միջև հաղորդակցության բացման, ինչպես նաև ադրբեջանա-հայկական սահմանի սահմանազատման հետ կապված հարցերը շատ կարևոր են, ինչպես և որոշ այլ կետեր»,- ընդգծել է նա։