Այժմ Ադրբեջանի զինված ուժերը գտնվում են Հայաստանի ինքնիշխան տարածքում. սա ագրեսիայի ակտ է․ Արմեն Գրիգորյան

Հայաստանի իշխանություններն ակնկալում են, որ Ռուսաստանը՝ որպես ռազմավարական գործընկեր, կօգնի լուծել երկու երկրների սահմանին ծագած խնդիրը՝ Ադրբեջանի վերջին գործողություններից հետո։Այս մասին «Կոմերսանտ»-ին ասել է Հայաստանի Անվտանգության խորհրդի քարտուղար Արմեն Գրիգորյանը Մոսկվայում ընթացող ԱՊՀ երկրների անվտանգության ուժերի հանդիպման շրջանակում։

Նա այսպես է պատասխանել այն հարցին, թե 1997 թվականի համաձայնագրի շրջանակում ինչ օգնության վրա է հույսը դնում Երևանը Մոսկվային դիմելիս, հիշեցնենք, որ երեքշաբթի պարոն Գրիգորյանը հայտարարեց Ռուսաստանին «Հայաստանի տարածքային ամբողջականությունը պաշտպանելու» կոչով: Արմեն Գրիգորյանը հավելել է նաև, որ ․«Նախապատրաստվում է գրավոր դիմում»։

«Այժմ Ադրբեջանի զինված ուժերը գտնվում են Հայաստանի ինքնիշխան տարածքում։ Սա ագրեսիայի ակտ է։ 1997 թվականին Հայաստանն ու Ռուսաստանը պայմանավորվել են փոխադարձաբար օգնել միմյանց նման դեպքերում։ Այս առումով մենք դիմեցինք Ռուսաստանին»,- «Կոմերսանտ»-ին ասել է Արմեն Գրիգորյանը:

Հարցին, թե առաջին հերթին Երևանը Մոսկվայից ինչպիսի՞ օգնություն է ակնկալում՝ ռազմական, թե դիվանագիտական, նա պատասխանեց. «Մենք կողմնակից ենք, որ այդ խնդիրը լուծվի դիվանագիտական ​​ճանապարհով։ Բայց եթե դա անհնար է լուծել դիվանագիտական ​​ճանապարհով, ապա պետք է խնդիրը լուծել ռազմական ճանապարհով»։

«Ռուսական կողմի ակտիվ մասնակցության շնորհիվ ռազմական գործողությունները դադարեցվեցին, սակայն խնդիրը չլուծվեց, քանի որ ադրբեջանական զինուժը շարունակում է մնալ Հայաստանի ինքնիշխան տարածքում»,-ամփոփել է Արմեն Գրիգորյանը։