Նավթի գները աշխարհում նվազում են, Հայաստանում՝ ոչ

Նավթի համաշխարհային գները շարունակում են անկում ապրել: Բրենթ տեսակի նավթի գինը լոնդոնյան բորսայում 2,49 տոկոսով նվազել է, և մեկ բարելի համար կազմել 60,15 ԱՄՆ դոլար: WTI տեսակի նավթի գինը Նյու Յորքի բորսայում իջել է 1, 59 տոկոսով՝ մեկ բարելի համար կազմելով 56,21 դոլար:

Newspress.am-ին Տնտեսական մրցակցության պետական ծառայությունից հետաքրքրվեց, թե ինչո՞ւ Հայաստանում վառելիքը, մասնավորապես, բենզինը չի էժանանում նավթի համաշխարհային գների նվազման ֆոնին, ինչին ի պատասխան նշեցինք, որ գների փոփոխությունը տարբեր երկրներում տարբեր չափով են ազդում: Դրան զուգահեռ Հայաստանում ևս բենզինի գները փոքր-ինչ նվազել են:

ՏՄՊՊՀ-ից հիշեցրեցին, որ Հայաստանում վաճառվող բենզինի գների մեջ նավթի կշիռը փոքր է և բացի այդ, բենզինի վաճառքի համար բարձր հարկեր են վճարում, այնպես որ նավթի գների նվազումը այնքան էլ չի անդրադառանում Հայաստանում բենզինի գների նվազման վրա:

Խնդրի վերաբերյալ Հայաստանի գործատուների միության նախագահ Գագիկ Մակարյանը նշեց, որ նավթամթերքի ներմուծումը մոնոպոլիզացված է՝ մի քանի ընկերություն է նավթամթերք ներկրում, նաև ներմուծողները խնդիր ունեն բարձր պահելու ոլորտի շահութաբերությունը և նավթամթերքի գները չեն նվազեցնում. նրանք գնային քաղաքականությունը պահում են իրենց ձեռքում: Ըստ նրա, ոչ ոք Հայաստանում իրացվող նավթամթերքի գները չի ուսումնասիրում, չի ուսումնասիրվում նաև գնագոյացման մեխանիզմները, դրանցում ինվոյսային գինը, որպեսզի հասկանան, թե ոլորտում որքա՞ն է շահութաբերությունը:

Ինչ վերաբերում է տնտեսական մրցակցության պետական հանձաժողովին, ապա տնտեսագետը նշեց, որ այս կառույցը իրավասու է և կարող է ստուգել, սակայն պետք է կարողանա խորությամբ հասկանալ ոլորտի խնդիրները, պատրաստ լինի բախվելու որոշակի շահերի:

«ՏՄՊՊՀ-ն կամ չի միջամտում, կամ չի կարողանում միջամտել»,- շեշտեց Գագիկ Մակարյանը: