Իշխանությունների բուռն ջանքերով և դրածոների ձեռքերով գեներալին հասցրին այս օրվան․ Նազիկ Ամիրյան (տեսանյութ)
Այսօր «Արցախի հերոս», գեներալ-լեյտենանտ Մանվել Գրիգորյանի մահվան տարելիցն է, ինչի կապակցությամբ նրա հարազատները, զինակից ընկերներն ու պարզապես քաղաքացիներ այցելել են նրա շիրիմին:
Tert.am-ի հետ զրույցում նրա կինը՝ Նազիկ Ամիրյանն ասաց, որ չնայած ծանր հիվանդությանը, նա պատերազմը սկսելուն պես մեկնեց Արցախ, թեև մեծ դժվարությամբ:
«Մեծ դժվարությամբ նրան իշխանությունները թողեցին, բայց պատերազմը սկսելուն պես նա մեկնեց Արցախ: Հոկտեմբերի 21-ին նրա առողջական վիճակը վատացավ և տեղափոխվեց Հայաստան, և չկարողացավ, իհարկե, իր սրտի ուզածը, իր փորձը փոխանցել մարտական գործողություններին»,– ասաց նա:
Ինչ վերաբերում է մինչ պատերազմը արտերկրում բուժում ստանալուն խոչընդոտելուն, Նազիկ Ամիրյանն ասաց.«Մեր իշխանությունների բուռն ջանքերով ու դրածոներով՝ դատավորի ու դատախազի ձեռքերով գեներալին հասցրին էս օրվան, որը մենք տեսում ենք: Այսինքն՝ ծայրահեղ ծանր վիճակում, երբ գեներալը գտնվում էր արհեստական շնչառության տակ, դատավորը նույնիսկ նիստ չարեց, որպեսզի թույլատրեր նրան տեղափոխեինք արտերկիր»:
Հիշեցնենք, որ 2018-ի իշխանափոխությունից հետո Մանվել Գրիգորյանը կալանավորվեց, նա մեղադրվում էր մի շարք ծանր հոդվածներով: Իրավահաջորդները առարկել են մահվան հիմքով գործը կարճելուն:
