Մեկնարկում է Գորիսի անվտանգության խորհրդի ստեղծումը. Արթուր Խոջաբաղյան

Գորիսի մտավորականության նախաձեռնող խումբը հայտարարում է Գորիսի անվտանագության խորհրդի ստեղծման մեկնարկը։ Այս մասին ֆեյսբուքյան իր էջում գրել է նախաձեռնող խմբի անդամ Արթուր Խոջաբաղյանը։

«Անվտանգության խորհրդի անելիքներն են լինելու մասնավորապես․

Նպաստել պարեկային ծառայության ուժեղացմանը բնակավայրերում, ջրամբարներում և այլ կարեւոր նշանակության օբյեկտներում՝ անհրաժեշտության դեպքում համալերով տեխնիկական միջոցներ։

Ստեղծել մեխանիզմներ բնակավայրերի բնակչությանը զինելու ուղղությամբ։

Նպաստել ինքնապաշտպանական ջոկատների ստեղծմանը եւ իրականացնել մարզումներ ֆիզիկա֊տակտիկական, ինչպես նաև կրակային պարապմունքների տեսքով։

Բոլոր դպրոցներում, կրթական օջախներում իրականացնել արագացված կուրսեր առաջին բուժօգնության ինչպես նաեւ արտարակարգ իրավիճակի դեպքում անհրաժեշտ ընթացակարգերի վերաբերյալ, ներգրավելով ԱԻՆ֊ի, Կարմիր Խաչի, Գորիսի ՈՄԱ-ի և նմանատիպ այլ կառույցների ռեսուրսները։

Ձևավորել համընդհանուր վստահության մթնոլորտ մեր բանակի հանդեպ, ուժեղացնել բանակ հասարակություն կապը։

Այն կետերը, որոնց համար անհրաժեշտ լինի ձևավորել հանրային պահանջ, կազմակերպել հավաքներ, միջոցառումներ և տարբեր ակցիաներ։

Նրանք, ովքեր ունեն առաջարկություններ, կարող են մոտենալ մեր նախաձեռնող խմբի անդամներից որևէ մեկին և օժանդակել անվտանգության խորհդի ձևավորմանը, օրակարգերի ձևավորմանը, ինչպես նաեւ գործընթացների իրականացմանը»,-գրել է Արթուր Խոջաբաղյանը։