Թեհրանը կողմ է Էրդողանի և Ալիևի նախաձեռնությանը. Թուրքիայում Իրանի դեսպան

Իրանը պաշտպանում է Թուրքիայի և Ադրբեջանի նախագահներ Ռեջեփ Թայիփ Էրդողանի և Իլհամ Ալիևի նախաձեռնությունը՝ ստեղծելու «3 + 3» ձևաչափ՝ Կովկասում խաղաղություն և համագործակցություն ապահովելու համար։ Այս մասին նշել է Անկարայում Իրանի դեսպան Մոհամմադ Ֆերազմենդի՝ Anadolu գործակալության համար հոդվածում։

Ֆերազմենդի խոսքով՝ այս նախաձեռնությունը համահունչ է Իրանի արտաքին քաղաքականության հիմնարար սկզբունքներին։

«3+3 նախաձեռնությունը համահունչ է Իրանի Իսլամական Հանրապետության արտաքին քաղաքականության հիմնարար սկզբունքներին, այն է՝ տարածաշրջանային խնդիրների լուծումը տարածաշրջանի երկրների կողմից, հակամարտության գոտիների նվազագույնի հասցնելը, համագործակցության զարգացումը և նպատակը. տարածաշրջանի երկրների հնարավորությունների միջոցով ստեղծել ուժեղ տարածաշրջան»,- ասել է դեսպանը։

Դիվանագետը հիշեցրել է, որ 2020 թվականին՝ Ղարաբաղյան Երկրորդ պատերազմի ժամանակ, Իրանի արտաքին գործերի նախարարի քաղաքական հարցերով տեղակալը կապ է պահպանել Բաքվի, Երևանի, Անկարայի և Մոսկվայի հետ։

«Տարածաշրջանի երկրները, բացառությամբ Վրաստանի, ընդունել են այս նախաձեռնությունը։ «3 + 3» կամ «3 + 2» նախաձեռնությունն իրականացնելու համար կա հավաքական կամք, ընդհանուր շահեր և բարձր մակարդակի փոխըմբռնում։ Անկասկած, 30-ամյա հակամարտության ավարտը և խաղաղության ու կայունության հաստատումը, Հարավային Կովկասի ռազմավարական տարածաշրջանում զարգացման, առևտրի, ներդրումների և անխոչընդոտ հաղորդակցության հնարավորությունների ի հայտ գալը ձեռնտու են տարածաշրջանի բոլոր երկրներին։ Այս նախաձեռնության հիմնական առավելությունն այն է, որ տարածաշրջանի երկրներից ոչ մեկը անտեսված չէ»,- գրել է Ֆերազմենդը։