Իսրայելը դիտարկում է Իրանի միջուկային օբյեկտների վրա հարձակման սցենար

Իսրայելը դիտարկում է իրադարձությունների զարգացման ռազմական սցենար, եթե Իրանի հետ միջուկային համաձայնագրի շուրջ բանակցություններն անհաջող լինեն։

Ավելի վաղ Իսրայելը Արաբական Միացյալ Էմիրությունների, Բահրեյնի եւ ԱՄՆ-ի հետ համատեղ մի շարք լայնածավալ զորավարժություններ է անցկացրել, այդ թվում՝ Կարմիր ծովում։ Գործողություններն ուղղված էին Իրանին խիստ նախազգուշացում ուղարկելուն։
Իսրայելը մտահոգված է այն հարցով, թե արդյոք երկիրը կկարողանա միայնակ գործել, եթե միջուկային բանակցությունները ձախողվեն, և դաշնակիցները հրաժարվեն ուժ կիրառել Իսլամական Հանրապետության դեմ:

Իսրայելի կառավարությունը 1,5 միլիարդ դոլար է հատկացրել երկրի զինված ուժերին Իրանի միջուկային օբյեկտներին հնարավոր հարված հասցնելուն նախապատրաստելու համար։

Իսրայելի անվտանգության ներկայացուցչի խոսքով՝ «Իսրայելը շահագրգռված չէ Իրանի հետ պատերազմ սկսել, բայց մենք թույլ չենք տա Իրանին միջուկային զենք ձեռք բերել: Իրանի միջուկային ծրագրի առաջընթացի լույսի ներքո մենք պատրաստվում ենք բոլոր տարբերակներին և սցենարներին, այդ թվում՝ ռազմականը»։

Իրանի հետ միջուկային համաձայնագրի շուրջ բանակցությունները Վիեննայում կվերսկսվեն նոյեմբերի 29-ին։ 

Միևնույն ժամանակ, Թեհրանը պնդում է, որ մտադիր չէ միջուկային զենք արտադրել, և որ իր գործունեությունն իրականացնում է օբյեկտներում բացառապես խաղաղ նպատակներով։ Այնուամենայնիվ, ՄԱԳԱՏԷ-ն մտահոգությամբ նշում է, որ Իրանում հարստացված ուրանի քանակը շարունակում է արագ աճել։

«Այսօր իրանցիներն ավելի մոտ են միջուկային զենքի համար նյութ ստեղծելուն, քան երբևէ նախկինում: Այս փաստը լուրջ հետևանքներ ունի Իսրայելի պետության անվտանգության վրա»,- հավելել է աղբյուրը:

Իսրայելի պաշտպանական կառույցները գնահատում են, որ Իրանը կարող է այնքան հարստացված ուրան կուտակել մեկ ամսում, որով կարող է արտադրել մեկ միջուկային ռումբ։