Գործող իշխանությանը մի կողմ դրած՝ յուրաքանչյուրս պարտավոր է աջակցել և կատարել կոնկրետ քայլեր Հայկական բանակը հզորացնելու համար․ գործարար

Ստեղծված իրավիճակում յուրաքանչյուրս պարտավոր է իր հնարավորության սահմաններում աջակցել և կատարել կոնկրետ քայլեր Հայկական բանակը հզորացնելու համար։ Այս մասին ֆեյսբուքյան իր էջում գրել է գործարար Ռոբերտ Ղազանչյանը։ 

Նրա գրառումն ամբողջությամբ՝ ստորև․

«Գործող իշխանությանը մի կողմ դրած…

Ստեղծված իրավիճակում յուրաքանչյուրս պարտավոր է իր հնարավորության սահմաններում աջակցել և կատարել կոնկրետ քայլեր Հայկական բանակը հզորացնելու համար։

Սա այն պահն է, որ հազարավոր կամավորներ, ինչպես նաև պայմանագրային զինծառայողներ ամիսներ շարունակ կանգնած են և շարունակում են կանգնել մեր ժամկետային զինծառայողների կողքին։

Այս իրավիճակում միտումնավոր եմ դիտարկում այն հանգամանքը, որ չկա որևէ աջակցություն այս Առյուծ տղաների ընտանիքներին, քանի որ սահմանին կանգնած ցանկացած զինվորական-կամավորի համար առաջնայինն իր ընտանիքն է։

Եվ, եթե Հայրենիքի սահմաններն անառիկ պահելու միտում ու ցանկություն կա, պետք է առաջնային այս սահմաններն օր ու գիշեր պահողների ընտանիքներին տրվի որոշակի աջակցություն:

Միայն այս պարագայում է հնարավոր ունենալ հոգեբանական ամուր և ոչ մտահոգ պատկեր, քանի որ յուրաքանչյուր տղամարդու համար առաջնայինն է իր ընտանիքը։
Վերջին սահմանային իրադարձությունները ցույց տվեցին, որ մենք ի վիճակի ենք դիմադրելու և հակահարված հասցնելու։

Դիմում եմ յուրաքանչյուր Հայի․

Մենք, միասնական լինելու դեպքում, կարող ենք դուրս գալ ստեղծված այս իրավիճակից։

Խաղաղ պայմաններում ավելի հեշտ է շենացնել և ուժեղացնել բանակը, քան պատերազմական ժամանակ։

Վստահեք այդ ամենի իրականացումը Ձեր մերձավորներին կամ ընկերներին, որտեղ չկան հիմնադրամներ կամ կոռուպցիոն մսխելու տարբերակներ։

Այս ամենը պետք է սկսել օր առաջ, քանի որ մեր անգործության հետևանքով, թուլանում է բանակը, իսկ իշխանությունների անտարբեր վիճակն այս ամենի նկատմամբ պայմանավորված է թուլակազմ լինելով ու վախի մոլուցքով, մասնավորապես՝ ինչ-որ պետության շահն առավել է, քան Հայաստանի շահը։

Հարկավոր է տարածել և օր առաջ մեկնարկել այս ամենը»,- գրել է գործարարը։