Շարժվում են անվասայլակներով, աշխատանքը կատարում բարձր պատասխանատվությամբ. հաշմանդամություն ունեցողների միջազգային օրն է (լուսանկարներ)

Դեկտեմբերի 3-ը հաշմանդամություն ունեցողների միջազգային օրն է:  ՆԳ նախարար Կարեն Սարգսյանի նախաձեռնությամբ, օրվա առթիվ ԱԻ պետական ծառայության տնօրեն գնդապետ Մեխակ Արզումանյանը, տեղակալ Սամվել Հայրումյանի և ՓՈՒՎ պետ Հրանտ Գասպարյանի ուղեկցությամբ, այցելել է արցախյան 3-րդ պատերազմի ժամանակ Շուշիում վիրավորում ստացած՝ 2-րդ կարգի հաշմանդամ Գեղամ Գրիգորյանի ընտանիքին, հետաքրքրվել առողջական վիճակով, փոխանցել նախարարի և ծառայության անձնակազմի՝ մշտապես օգնելու և աջակցելու պատրաստակամությունը:
Նախքան պատերազմը, Գեղամը ծառայում էր ԱԻՊԾ Շուշիի շրջանային արտակարգ իրավիճակների բաժնում: Պատերազմի ընթացքում ստացել է բեկորային վիրավորւմ, վիրահատվել է 2 անգամ: Առայժմ ստացիոնար բուժումներ է ստանում վերականգնողական կենտրոնում:

Հաշմանդամների օրվա նպատակը սահմանափակ կարողություն ունեցող մարդկանց խնդիրների մասին բնակչության տեղեկացվածության մեծացումն է, նրանց աջակցությունը և հասարակական կյանքին ընդգրկելը:

Հաճախ նրանք կրթության, զբաղվածության, առողջապահության, սոցիալական ու իրավական աջակցության համակարգին հավասար հասանելիություն չունեն, բայց դա դեռևս դատավճիռ չէ:

ԱԻ պետական ծառայությունում վաղուց ստեղծվել է այնպիսի միջավայր, որտեղ հաշմանդամն աշխատում է բնականոն ռեժիմով: «911» ահազանգման կենտրոնում հաշմանդամության կարգ ունեցող 3 աշխատակիցներ կան. Դավիթ Հակոբյանը, Աշոտ Սարգսյանը և Էդուարդ Երամիշյանը:

Նրանք շարժվում են անվասայլակների ուղեկցությամբ՝ աշխատանքը կատարում բարձր պատասխանատվությամբ: