Մեր առաքելությունից շեղվելու իրավունք չունենք. Կայացավ Կապանի նորընտիր ղեկավարի երդման արարողությունը (տեսանյութ)

Այսօր՝ դեկտեմբերի 3-ին, Կապանի մշակույթի կենտրոնում տեղի ունեցավ նորընտիր համայնքի ղեկավար Գևորգ Փարսյանի երդման և պաշտոնի ստանձման հանդիսավոր արարողությունը։ Նիստը վարում էր համայնքի ավագանու տարիքով ավագ անդամ՝ Սպարտակ Զաքարյանը։ Ներկա էր ավագանու 27 անդամներից 25-ը։

Առաջինն ամբիոնին մոտեցավ համայնքի ղեկավար Գևորգ Փարսյանը՝ ընթերցելով երդման տեքստը՝ «․․․Պարտավորվում եմ պաշտպանել համայնքի իրավունքները, օրինական շահերը և սեփականությունը, ուժերիս անմնացորդ նվիրումով սատարել ժողովրդի հավատին, նպաստել նրա նյութական և հոգևոր վերելքին»։

Երդման հանդիսավոր արարողությանը մասնակցել և իրենց շնորհավորանքի խոսքն են հղել Հոգեշնորհ Տեր Մակար Վարդապետ Հակոբյանը, Սյունիքի մարզպետ Մելիքսեթ Պողոսյանը, պատմաբան Գրիշա Սմբատյանը և Կապանի բնակիչ Ռիտա Դավթյանը։ Եզրափակիչ խոսքով նիստն ամփոփեց Գևորգ Փարսյանը՝ ևս մեկ անգամ շնորհավորելով ավագանիներին մանդատ ստանալու կապակցությամբ, ինչպես նաև շնորհակալություն հայտնել կապանցիներին ցուցաբերած բարձր վստահության համար։

«Առաջիկա հինգ տարիների ընթացքում մենք պետք է ավելի քրտնաջան աշխատենք, նույնիսկ արտակարգ ռեժիմով, որպեսզի արդարացնենք մեր համաքաղաքացիների վստահությունը, որպեսզի օր առաջ լուծված տեսնենք կապանցիներին հուզող խնդիրները և անենք հնարավորն ու անհնարինը, որ Կապանի ամեն մի նոր օրը տարբերվի նախորդից՝ լինելով ավելի լավը։ Սա է մեր առաքելությունը, որից շեղվելու իրավունք պարզապես չունենք»,– նշեց Գևորգ Փարսյանը։

Արարողության ավարտին հնչեց Կապանի օրհներգը։ Նիստի առցանց հեռարձակումը դիտելու համար կարող եք անցնել հետևյալ հղմամբ՝