Նիկոլն ա կզել Ալիևի դեմը, դու էլ կզողի դեմը կզում ես․ Տիգրան Քոչարյանը՝ Սամվել Բաբայանի մասին

Սամվել Բաբայանը շատ է ակտիվացել, վերջին շաբաթում ինչքան իշխանամետ ալիք կա, երևաց։ Այնպիսի տպավորություն էր, որ հանձնարարական էր ստացել PR անել, և ամեն ինչ լցնել բանակի վրա, ամբողջ մեղքը գցել բանակի վրա։ Այս մասին այսօր մամուլի ասուլիսի ժամանակ ասաց մեդիափորձագետ Տիգրան Քոչարյանը։ 

«Այո, մենք կարող ենք ասել, որ Բաբայանը հիմա բարոյական աջակցություն է ցուցաբերում Փաշինյանին և չի էլ թաքցնում։ Գիտեք, որ լուրեր են պտտվում, որ Սամվել Բաբայանը պարտքերի մեջ խրված է եղել և բոլորին պարտք լինելով՝ հայտնվել է Արցախում, այնուհետև հայտնվել է ԱԽ ղեկավարի պաշտոնում, իսկ հիմա վարում է BMW X7 մեքենա։ Հարց է առաջանում՝ մարդը, որը պետական պաշտոն է զբաղեցրել, այդ ընթացքում այդ մեքենան որտեղի՞ց է հայտնվել իր մոտ, ո՞ր արժանիքների համար և ի՞նչ է արել։ Մարդն այդքան պարտքեր ուներ, որ մենք ենք անհարմար զգում, որ պատերազմի հերոսը պարտքերի մեջ է։ Բավականին շռայլ կյանք է վարում՝ իր հնավորությունների համեմատ»,- ասաց Քոչարյանը։  

Նրա խոսքով՝ Սամվել Բաբայանն ունի ֆանտաստիկ անցյալ, նաև նրա շնորհիվ, կարելի է ասել, որ Արցախը՝ հյուսիսային ուղղությամբ, փրկվել է։

«Բայց այն, ինչ անում է հիմա․․․ գիտե՞ք՝ այնպիսի տպավորություն է, որ մարդը, որն իրեն վերագրում է այն, որ ինքն ազատագրել է ամբողջ Արցախը, հիմա այն տրամաբանությամբ է մտածում, որ «ա՜, լավ եմ արել՝ ազատագրել եմ, հիմա ոնց վերցրել եմ, տենց էլ տալիս եմ, ձեզ ի՞նչ»։ Այդ տրամաբանության մեջ էլի մարդիկ կան՝ իբր իմ ազատագրած Քելբաջարն ա, կամ իմ ազատագրած Ֆիզուլին ա, ես ազատագրել եմ, ես էլ կտամ»,- նշեց բանախոսը՝ զարմանք հայտնելով, թե ինքը չի պատկերացնում, թե մարդ ոնց կարող է կռանալ Փաշինյանի առջև ու իր հրամանները կատարել։

«Հատկապես եթե դու մարտական գեներալ ես եղել ու փառավոր անցյալ ունես, ու այդքանից հետո դու խոնարհվում ես մեկի առջև, ում Ալիևն ինչ ուզես արել ու անում է։ Ո՞նց կարելի է։ Էն մեկն ա կզել Ալիևի դեմը, դու էլ կզողի դեմը կզում ես։ Ես հասկանում եմ, որ գումար ա․․․ մարդիկ կարոտել են լավ կյանք վարելուն, պարտքերի մեջ է եղել, բայց ինչ-որ տեղ կա, որ պիտի ստոպ լինի»,- ընդգծեց մեդափորձագետը։