Հրազդանում հերթական սպանդն է իրականացվում. սպանված շներից մի քանիսի դիակները նրանց հաջողվել է թաքցնել (լուսանկարներ)

Հայտնի բլոգեր Վարդան Ղուկասյանը՝ Դոկ մականվամբ, իր հերթական լայվի ժամանակ անդրադարձել է Հրազդանում տեղի ունեցած մի դեպքի, երբ ԱԻՆ-ն անտեսել է շան համար կատարված օգնության կանչը: Նա հնչեցնելով բացասական գնահատականներ ԱԻՆ-ի աշխատակիցների հասցեին՝ անդրադարձել է Հրազդանի ԱԻՆ-ի ղեկավարի անբարեխիղճ աշխատանքին՝ մատնշնելով մի շարք թերություններ:

Իրականում Վարդան Ղուկասյանը չի սխալվել այնքանով, որ ԱԻՆ-ը ոչ միայն սրտացավորեն չի մոտենում իր աշխատանքին, այլև անօրինական գործողություններ է իրականցնում կենդանիների նկատմամբ:

NEWSPRESS.am-ի հետ զրույցում կենդանիների պաշտպանության Դինգո ՀԿ համակարգող Գոհար Մանուշակյանը նկատեց, որ օրերս մեծ սպանդ է տեղի ունեցել Հրազդանում:

«Վերջին 6 ամսվա ընթացքում սա արդեն 3-րդ անգամն է, որ նման մաշտաբով սպանում է թափառող շներին: Մի պահ կարծես նվազել էին սպանդերը, հիմա նորից մեծ թափով գլուխ են բարձրացրել»,-ասաց Գոհար Մանուշակյանը:

Թե քանի շուն է սպանվել՝ կենդանիների պաշտպանները հստակ թվեր չեն կարողանում ներկայացնել, քանի որ սպանդից հետո հավաքում են սպանված կենդանիների մարմինները:

Հարակից տարածքում գտնվող երեխաններն են տեսել մի երկուսին, մի քանի շների բացակայություն էլ նկատել են այն բնակիչները, ովքեր հոգ են տանում նրանց համար:

Բնակչուհներից մեկն ասել է, որ իր մոտ 7 շուն էր կերակրվում, հիմա նրանցից 2-ը չեն գալիս: Հայտնաբերվել է նաև 2 այլ շան դիակ, ևս 5-ի բացակայությունը նկատվել է:

Շներից մեկն էլ կլինիկայում է: Այս պահին նրան վիրահատում են։

Ամեն անգամ նման դեպքերի հանդիպելիս, կենդանիների պաշտպանները դիմում են ոստիկանություն, սակայն երբևէ որևէ մեկի նկատմամբ ոչ մի պատժամիջոց չի կիրառվել:

Գոհար Մանուշակյանը մեզ հետ զրույցում հիշում է դարձյակ Հրազդանում տեղի ունեցած մեկ այլ դեպք, երբ քաղաքացին տանջել էր շանը. կոտրել են շան կողոսկրերն ու քարշ տվել մեքենայով՝ ենթարկելով անմարդկային տանջանքների: Ու թեև վերջինս անգամ խոստովանել էր, որ ինքը նման բան է արել, սակայն գործը կարճվել է:

Կտենք, որ քրեական օրենսգիրքը կենդանու նկատմամբ դաժան վերաբերմունքի համար նախատեսում է քրեական պատասխանատվություն:

Հոդված 258.2–ը սահմանում է, որ «Կենդանու նկատմամբ դաժան վերաբերմունքը, այն է` կենդանու կյանքի ընդհատումը խեղդելու, կախելու, մասնատելու, ուժեղ հարվածելու, մտրակելու, հրազենով կրակելու, թունավորելու կամ այնպիսի նյութ ներարկելու միջոցով, որ հանգեցնում է դաժան կամ ցավոտ մահվան, ողջ վիճակում կենդանուն մաշկահատելը, անդամահատելը, կրակը նետելը, բարձրությունից կամ փոխադրամիջոցներից նետելը, կենդանիների մարտեր կազմակերպելը և իրականացնելը, ինչպես նաև կենդանիների նկատմամբ սահմանված կարգի խախտմամբ գիտաուսումնական փորձարկումներ կատարելը և այլ դաժան վերաբերմունքը` պատժվում է տուգանքով` նվազագույն աշխատավարձի հարյուրապատիկից երեքհարյուրապատիկի չափով, կամ կալանքով` մեկից երեք ամիս ժամկետով, կամ ազատազրկմամբ` առավելագույնը մեկ տարի ժամկետով»:

Սակայն սա միայն սևով գրված է սպիտակի վրա, իսկ գործնականում դեռ ոչ մի քաղաքցի և ոչ մի կազմակերպություն պատիժ չի կրել շան վրա կրակելու, նրան տանջելու կամ վիրավորելու համար: