Ադրբեջանի նախագահը վերջին պահին Քի Վեսթում հրաժարվեց ստորագրել, ասաց, որ չի կարողացել համոզել նույնիսկ իր ընտանիքի անդամներին. Քոչարյանը՝ Մեղրիի տարբերակի մասին (տեսանյութ)

ՀՀ երկրորդ նախագահ Ռոբերտ Քոչարյանն այսօր մամուլի ասուլիսում պատասխանել է Ղարաբաղյան հակամարտության կարգավորման Մեղրիի տարբերակի մասին: 

-Ինչո՞վ էր տարբերվում Մեղրիի տարբերակը, որը Ձեր իշխանության տարիներին առաջարկվում էր իբրև լուծում Ղարաբաղյան հարցի և հայ-թուրքական հարաբերությունների կարգավորման, այն տարբերակից, որը հիմա իրագործվում է և ադրբեջանցիներն անվանում են «Զանգեզուրի միջանցք» Մեղրիով: 

-Այն ժամանակ Թուրքիան այդ պատմության մեջ չկար, երկրորդը՝ իսկ դուք տարբերությունը չե՞ք տեսնում: Այն ժամանակ խոսքը Ղարաբաղը Հայաստանին միացնելու մասին էր: Քի Վեսթի պայմանագրով ենթադրվում էր որ Ղարաբաղը միանում է Հայաստանին մի միջանցքով, որը ևս ունենալու է նույն կարգավիճակը, ինչ Ղարաբաղը: Միջանցքի լայնությունը, ինչը փաստաթղթերում գրված չի, բայց անվտանգության տեսանկյունից ես այսպես էի ձևակերպել՝ գրադի հեռավորության երկու կողմի վրա՝ 21+21՝ 42 կմ միջանցքով: Հիմա համեմատեք այսօրվա վիճակի հետ, այսօրվա Ղարաբաղի անորոշության՝ և՛ անվտանգային առումով, և՛ կարգավիճակի: Տարբերությունը դրա մեջ է: Այդ լուծումը չիրագործվեց, որովհետև Ադրբեջանի նախագահը վերջին պահին Քի Վեսթում հրաժարվեց ստորագրել, ինքն ասաց, որ չի կարողացել համոզել նույնիսկ իր ընտանիքի անդամներին, ինքն ուղղակի ասաց, որ համարում է որ գերագնահատել է իր հնարավորությունը ազդելու հասարակական կարծիքի վրա: 

Հիմա պատկերացրեք, որ ունենայինք Քի Վեսթի լուծումը: Ասօրվա իրավիճակի հետ եզրեր չկան:

Դրա դիմաց ադրբեջանցիները ստանում էին ճանապարհի իրավունք, ի դեպ, խոսքը ավտոբոմիլային ճանապարհի մասին էր, երկաթուղու մասին նույնիսկ գրված չէր: