Պապիկյանի հրամանով՝ ԶՈւ ողջ անձնակազմը պարգևավճար է ստացել

ՀՀ պաշտպանության նախարարի հրամանով ԶՈւ ողջ անձնակազմը պարգևավճար է ստացել. տեղեկությունը «Փաստինֆո»-ին հաստատեցին ՀՀ պաշտպանության նախարարությունից։

Նշենք, որ մանրամասներին տեղեկանալու համար «Փաստինֆո»-ն գրավոր հարցմամբ է դիմել նախարարություն՝ մասնավորապես պարզելու, թե որքա՞ն գումար է կազմել պարգևավճարները, արդյոք պաշտպանության նախարարը, փոխնախարարները, ԶՈՒ ԳՇ պետը եւս ստացել են պարգևավճար և որքա՞ն։ Գրավոր հարցմանը նախարարությունը կպատասխանի ավելի ուշ։

«Փաստինֆո»-ին հաջողվել է նախարարությունից տեղեկանալ ծառայության համար սահմանված հավելավճարների մասին։

«Ինչ վերաբերում է ծառայության համար սահմանված հավելավճարներին, ապա դրանք, ըստ գործող կարգի, կվճարվեն մինչև հաջորդ ամսվա 7-րդ աշխատանքային օրը»,- հայտնեցին ՀՀ ՊՆ-ից։

Նշենք, որ ահազանգեր էինք ստանում, որ ՀՀ ԶՈՒ պայմանագրային զինծառայողների դեկտեմբեր ամսվա աշխատավարձը փոխանցվել է միայն մասամբ։ Ըստ մի շարք լրատվականների դա պայմանավորված է թերի ֆինանսավորմամբ։ ՀՀ ՊՆ-ն անդրադարձել էր տեղեկություններին և հայտնել, որ աշխատավարձերի ֆինանսավորման հետ կապված որևէ խնդիր չկա, իսկ պայմանագրայինների դեկտեմբեր ամսվա վարձատրության հետ կապված առկա է թյուրըմբռնում, քանի որ տվյալ վարձատրությունը ձևավորվում է երկու հիմնական գումարից՝ բուն աշխատավարձից և հավելավճարից, որը կախված է ծառայության պայմաններից և տեղանքից։

«Ըստ այդմ՝ զինծառայողների դեկտեմբեր ամսվա բուն աշխատավարձը լիարժեք փոխանցվել է, իսկ հավելավճարները, ըստ գործող կարգի, վճարվելու են հաջորդ ամսվա (տվյալ դեպքում՝ հունվարի) սկզբին, երբ կհաշվարկվի զինծառայողների ծառայության փաստացի օրերի քանակը։ Այսինքն՝ դեկտեմբեր ամսվա հավելավճարները, տվյալ դեպքում, կվճարվեն մինչև 2022 թվականի հունվար ամսվա 7-րդ աշխատանքային օրը։
Միևնույն ժամանակ, իրականությանը չի համապատասխանում նաև պնդումը, թե ՊՆ առանձին ստորաբաժանում, այս դեպքում՝ ռազմական ոստիկանությունը, պարգևավճար է ստացել»,- հայտնել էին ՊՆ-ից։