Թուրքիան առաջ է քաշում նախապայմաններ, որոնք փաստացի ընդունվել են ՀՀ ներկայիս իշխանությունների կողմից․ Դավիթ Շահնազարյան

Պատերազմը չի ավարտվել։ Այս մասին ասուլիսի ժամանակ ասաց ԱԱԾ նախկին տնօրեն Դավիթ Շահնազարյանը։ Նրա գնահատմամբ, այս իրավիճակում գնալ Թուրքիայի հետ դիվանագիտական հարաբերությունների հաստատման և սահմանների բացման, մեծագույն սպառնալիք է ՀՀ-ի համար։

Դավիթ Շահնազարյանը նկատում է, որ Թուրքիան առաջ է քաշում նախապայմաններ, որոնք փաստացի ընդունվել են ՀՀ ներկայիս իշխանությունների կողմից։

«Թուրքիան պահանջում է ճանաչել Կարսի պայմանագիրը, ընդունել Ադրբեջանի տարածքային ամբողջականությունը և Արցախի հանրապետությունը որպես Ադրբեջանի անքակտելի մաս ճանաչել ու հրաժարվել Ցեղասպանության հարցից։ Առաջ է քաշվել նաև նոր՝ չորրորդ պայմանը՝ միջանցք Ադրբեջանի և Նախիջևանի միջև, որը այլ կերպ կոչվում է «Թուրանի միջանցք»,- ասաց Դավիթ Շահնազարյանը։

Անդրադառնալով սահմանազատման ու սահմանագծման խնդրին, Շահնազարյանը նշեց, որ այն սպառնալիք է։ Նա վստահեցրեց, որ գործընթացը երկար չի տևի, և արդյունքում Գորիս-Կապան ճանապարհին տեղադրված ադրբեջանական սահմանային և մաքսային կետերից կունենանք նաև Երևան-Գորիս ճանապարհի վրա, Տիգրանաշենում, Ոսկեպարի շրջանում։

Երրորդ մեծագույն սպառնալիքը Հայաստանի համար, ըստ ԱԱԾ նախկին տնօրենի, համարում է հաղորդակցության ուղիների բացումը։

«Սրա շուրջ կարծես թե արդեն պայմանավորվել են։ Խոսքն այն ուղիների մասին է, որոնք պետք է կապեն Ադրբեջանը Նախիջևանին։ Հայաստանում խոսում են բոլոր կոմունիկացիաների բացման մասին, մինչդեռ Ադրբեջանը դրանք փակում է, վառ օրինակը Գորիս-Կապան ճանապարհահատվածն է, որը մեզ համար զարկերակի նշանակություն ունի»,- նշեց Դավիթ Շահնազարյանը։

Անկախ այն բանից, թե այս երեք գործընթացները կհաջողվեն, թե ոչ, ըստ Դավիթ Շահնազարյանի, Հայաստանի հաջորդ իշխանությունը կարող է անմիջապես դրանք չեղյալ համարել՝ հիմք ընդունելով միջազգային իրավունքը։