Ղարաբաղյան պատերազմի ժամանակ Ֆրանսիան միանշանակ կանգնած էր Հայաստանի կողքին. Ալիև

Ադրբեջանի նախագահ Իլհամ Ալիևը ադրբեջանական հեռուստաալիքներին տված հարցազրույցի ժամանակ մեկնաբանել է Ադրբեջանի և Հայաստանի միջև հետպատերազմյան մերձեցման հարցում ԵՄ-ի միջնորդական մասնակցության հավանականությունը։

«Մենք չենք բացառում նման հնարավորությունը»,- մասնավորապես ասել է Իլհամ Ալիևը։ - Բրյուսելում գտնվելու ժամանակ ես դա ասել եմ Եվրամիության ղեկավարությանը։ Ամենակարևորն այն է, որ երկկողմ մերձեցման օրակարգը ճիշտ ձևակերպվի, և Հայաստանը, որը հաճախ գործընկերոջը մի բան է ասում, մյուսներին՝ ճիշտ հակառակը, իսկ մեկ ուրիշին առաջարկում է այլ տարբերակ, իրեն պիտի անկեղծ պահի։ Ինչ վերաբերում է Ադրբեջանի դիրքորոշմանը, ապա այն միանշանակ է. Կարծում եմ, որ Եվրամիությունը կարող է արդյունավետ դեր խաղալ Ադրբեջանի և Հայաստանի միջև հարաբերությունների կարգավորման գործում։ 

«Ղարաբաղյան պատերազմի ժամանակ Ֆրանսիան, չնայած միջնորդի կարգավիճակին, որը պարտավորեցնում էր չեզոք մնալ, միանշանակ կանգնած էր Հայաստանի կողքին:

Բրյուսելում կայացած վերջին հանդիպմանը մենք ականատես եղանք Եվրամիության կողմից օբյեկտիվության և հավասարության հստակ պահպանման, ինչը մեզ թույլ է տալիս խոսել դրական դերի մասին, որը կարող է ունենալ  Հայաստանի և Ադրբեջանի միջև հարաբերությունների կարգավորման գործում, այդ թվում՝ ապահովելով տնտեսական և ֆինանսական աջակցություն տարածաշրջանում տրանսպորտային զարկերակների ապաշրջափակմանը և, մասնավորապես, «Զանգեզուրի տրանսպորտային միջանցքի» ծրագրի իրականացմանը։

Կցանկանայի նաև ընդգծել, որ եվրոպական պետությունների հանրությունը, որն ունի հսկայական քաղաքական փորձ և հզոր ինտելեկտուալ ռեսուրսներ, կարող է առաջարկություններ ներկայացնել բանակցողներին երկկողմ հարաբերությունների կարգավորման, այդ թվում՝ սահմանների որոշման հետ կապված հարցերի մի ամբողջ շարքի վերաբերյալ։ Ամեն դեպքում, Ադրբեջանը կողջունի նման քայլերը»։