Սերժ Սարգսյանը ներկայացրեց բոլոր ուղղությունները, որոնք կարող էին օգնել այս իշխանությանը չմտնել վտանգավոր ճանապարհի մեջ. Արտակ Զաքարյան

Այս իշխանությունը շարունակում է իր ձախողումները փաթաթել նախկին իշխանության վզին։ Այս մասին ասուլիսի ժամանակ ասաց ՀՀԿ ԳՄ անդամ, Պաշտպանության նախկին փոխնախարար Արտակ Զաքարյանը։ Նա նկատում է, որ իշխանության նման դիրքորոշումն այնքան էլ կարևոր չէ, կարևորը՝ գործող իշխանությունը գիտակցի, որ իրականում ինքն է մեղավոր կատարվածի համար։

Անդրադառնալով ՀՀ երրորդ նախագահ Սերժ Սարգսյանի հարցազրույցին՝ Արտակ Զաքարյանը նշեց, որ նախագահը ներկայացրեց բոլոր ուղղությունները, որոնք կարող էին օգնել այս իշխանությանը չմտնել վտանգավոր ճանապարհի մեջ։

«Սերժ Սարգսյանի կողմից հնչեցին մի շարք կարևոր և տվյալ ժամանակահատվածի համար առանցքային հայտարարություններ»,- ասաց նա։

Նախկին փոխնախարարի խոսքով՝ երրորդ նախագահը մի շարք փակագծեր բացեց, որոնք պատասխանում էին արցախյան խնդիրների բանակցային կարգավորման տարբեր փուլերի հետ կապված հարցերին։

«Սերժ Սարգսյանը ներկայացրեց ուղղություններ, որոնք կարող էին օգնել այս իշխանություններին չմտնել այն վտանգավոր ճանապարհների մեջ, որոնցով անցան, չտանեին պատերազմի, ունենալ և շարունակել պահպանել բանակացային այն ամուր, կայուն դիրքերը, որոնք իրենց թողել էին, հասկանալի մնալ միջազգային հանրության համար և դրա արդյունքում կարողանալ պաշտպանել Հայաստանի և Արցախի իրավական շահերը»:

Արտակ Զաքարյանն ասաց, որ այս իշխանությունները վերջին երեք տարում ամեն կերպ փորձել են միտումնավոր և ոչ այնքան միտումնավոր ձախողումները փաթաթել նախկին իշխանությունների վրա, նրանց մեղավորներ նշանակել։

«Այս բոլոր զառանցանքները, այս կարգի անհեթեթությունները ցույց են տալիս, որ այս երեք տարին չբավարարեց սրանց գոնե նվազագույն փորձառություն, կառավարման հմտություններ ձեռք բերել, գոնե հասկանային աշխարհաքաղաքական և տարածաշրջանային զարգացումներն ու իրավիճակը, գոնե կարողանալ մի փոքր արժանապատվություն ունենալ ու դուրս գալ այս վիճակից, գոնե գիտակցեն, որ այս ծանր դժվարին կործանված, կործանարար ժամանակահատվածի համար միակ և անփոխարինելի պատասխանատուները հենց իրենք են, որ կան»,- ասաց բանախոսը։

Նա ընդգծեց, որ հայ ժողովուրդն ունի անկախ պետություն ունենալու, այս տարածաշրջանում կայուն, անվտանգ, ապահով և զարգացող երկիր ունենալու հավակնություն և հայ ժողովուրդը շարունակելու է իր ինքնիշխանության, տարածքային ամբողջականության, միջազգային բոլոր իրավունքների համար պայքարը։

«Որևէ մեկին չթվա, թե ղարաբաղյան հիմնախնդիրը կարգավորվել է, պատերազմը վերջակետ է դրել բոլոր տեսակի հավանություններին, որոնք ունի հայ ժողովուրդը»,-ասաց նա։