ԵՄ-ն շուրջ 2 մլրդ դոլար է տրամադրում Ադրբեջանին՝ պատերազմի հետևանքով իրեն անցած տարածքներում ներդրումային ծրագրեր իրականացնելու նպատակով. Դավթյան

Մինչ Հայաստանի պսևդո-իշխանություններն ու մերձիշխանավոր շրջանակները շարունակում են ցնցվել ԵԽԽՎ անհեթեթ բանաձևի առթիվ, ԵՄ-ն շուրջ 2 մլրդ դոլար է տրամադրում Ադրբեջանին՝ պատերազմի հետևանքով իրեն անցած տարածքներում նարդրումային ծրագրեր իրականացնելու նպատակով: Այս մասին ֆեյսբուքյան իր էջում գրում է քաղաքական գիտությունների դոկտոր, էներգետիկ անվտանգության հարցերով փորձագետ Վահե Դավթյանը:

«Նույն մոտեցումը ցուցադրվեց նախորդ տարի, երբ «Արևելյան գործընկերության» շրջանակներում որոշում կայացվեց Հայաստանին տրամադրել 2,6 մլրդ եվրո՝ առավելապես վարկերի տեսքով, իսկ Ադրբեջանին՝ 150 մլն եվրո: Այդ ժամանակ ԱԺ ամբիոնից քպ-ն պաթոսախառն հայտարարում էր, որ դա Հայաստանում ժողովրդավարության առաջխաղացման ուղիղ արգասիք է ու ավտորիտար Ալիևին պատժելու միտում:

Սակայն և այն ժամանակ, և այսօր ՛՛ժողովրդավարության բաստիոնի՛՛ պարագլուխները մոռանում են, որ ԵՄ օգնությունն Ադրբեջանին չափազանց խորքային է ու տարատեսակացված:

ԵՄ-ն Բաքվի հետ իրականացնում է այնպիսի երկարաժակետ ռազմավարական ծրագրեր, որոնք արդեն հսկայական ֆինանսական միջոցներ են գեներացնում: Այդ ծրագրերից նշեմ միայն երկուսը.

1. ԵՄ անմիջական քաղաքական ու տնտեսական աջակցության ներքո կյանքի կոչված ու արդեն գործող ՛՛Հարավային գազային միջանցք՛՛ մեգանախագիծը մինչև 2046 թ. Ադրբեջանին բերելու է շուրջ 40 մլրդ դոլարի եկամուտ:

2. Առավելապես եվրոպական ընկերություններից բաղկացած կոնսորցիումի կողմից ադրբեջանական Ազերի-Չերագ-Գյունեշլի նավթագազային հանքավայրերի խմբում արդյունահանման աշխատանքների իրականացման արդյունքում Ադրբեջանի նավթային հիմնադրամը 2001-2020 թթ. ստացել է մոտ 150 մլրդ դոլարի եկամուտ:

Այսօր էլ, ներդրումային ծրագրի մեկնարկի հետ մեկտեղ, Բրյուսելը բանակցություններ է նախաձեռնել Բաքվի հետ՝ Ադրբեջանից ԵՄ բնական գազի արտահանման ծավալների հնարավոր ավելացման շուրջ՝ Ռուսաստան-Ուկրաինա էսկալացիայի դեպքում:

Հայաստանում տիրող ավանդական պատկերացումները ԵՄ մասին շարունակում են չափազանց իդեալիստական մնալ: Մինչդեռ Միությունն այսօր առավել պրագմատիկ էլ քան երբևէ»,- գրել է Դավթյանը: