Նոր տարի ա, խոզի բուդ ա...3 տարի ա՝ արևային պանել ենք դնում. ակտիվ աշխատեք, հարցը լուծենք, գնանք առաջ. Երևանի քաղաքապետը խիստ հանձնարարականներ է տվել

Այսօր՝ փետրվարի 7-ին, Երևան քաղաքի ավագանու նիստի ժամանակ Զարգացման և ներդրումային ծրագրերի վարչության ղեկավարի ժամանակավոր պաշտոնակատար Վահագն Գրիգորյանը զեկուցեց, որ Երևանի համար Եվրամիության կողմից իրականացվող արևային ծրագիրն իրականացվում է երկու փուլով: Առաջին փուլն արդեն ավարտված է և թվով 43 շենքում տեղադրված են արևային կայաններ, իսկ երկրորդ փուլը մեկնարկել է նոյեմբերի վերջին, որտեղ ներգրավված է 54 բազմաբնակարան շենք։ Թվով 26 շենքի բակում իրականացվել են հողանցման աշխատանքներ, թվով 33 շենքում և ընդհանուր օգտագործման բակային տարածքներում առկա 11 հենասյուների վրա մոնտաժվել են լուսավորության համակարգեր: Այս պահին մոտ 10 շենքում աշխատանքներ են իրականացվում: 

Քաղաքապետ Հրաչյա Սարգսյանն ի պատասխան նշեց. «Եկեք մի բան պայմանավորվենք էլի: Էն, ինչ-որ նախորդին զեկուցում եք, եկեք նորը մի զեկուցեք... ես հիշում եմ էլի: 0-ից չսկսենք, անիմաստ է ժամանակ ծախսենք:

Սարգսյանը հանձնարարական տվեց վարչական շրջանների ղեկավարներին՝ ակտիվ աշխատանքներ տանել արևային պանելների տեղադրման հարցը լուծելու ուղղությամբ. «Մենք փետրվարի վերջ պետք է վերջացնենք: Ասեք` ինչ է պետք, ես էլ կարող եմ գալ, խոսել բնակիչների հետ, վերջացնենք այդ ծրագիրը»,- ասաց Սարգսյանը:

Վերջինս նաև հանձնարարեց դիմել բանկերին, հասկանալ՝ քանի ոչ բարեխիղճ տնտեսվարողների վերաբերյալ ենք բանկերից երաշխիքներ ուզել 2021 թվականին:

«Դա մեր սխալ կազմակերպվածության արդյունքն է, կամ տեխբնութագրի մեջ չենք նշել դրա մասին, կամ էլ աշխատանք չենք արել, մեր խնդիրն է։ Իսկ երբ շենքը դեկտեմբերի 22-ին քանդում են ու չեն գալիս, պետք է ֆիքսենք, որ հունվար է, Նոր տարի է, խոզի բուդ է, դրա համար պետք չի, որ դեկտեմբերի 22-ից գան քաշեն: Այստեղ մեր մեղավորությունն էլ ունենք։ Գիտեմ, խնդիրներ կան համատիրությունների հետ, ակտիվ աշխատեք, այդ հարցը լուծենք, գնանք առաջ: Թե չէ երեք տարի է՝ արևային պանել ենք դնում»,- նշեց Սարգսյանը: