Արիանա Հովսեփյանը դատարանում հաղթեց Հայկ Սարգսյանին

Դատարանը մերժել է ՔՊ-ական պատգամավոր Հայկ Սարգսյանի հայցն ընդդեմ Արիանա (Արմենուհի) Հովսեփյանի։

Newspress.am-ի հետ զրույցում Արիանա Հովսեփյանի փաստաբան Գարիկ Սահակյանը տեղեկացրեց, որ փետրվարի 2-ին Երևան քաղաքի առաջին ատյանի ընդհանուր իրավասության դատարանը քննել է քաղաքացիական գործն ըստ հայցի Ազգային ժողովի պատգամավոր Հայկ Զարեհի Սարգսյանի ընդդեմ «Անդրադարձ մամուլի ակումբ» ՀԿ-ի «Նյուզ պրես» կայքի Արիանա (Արմենուհի) Լյովիկի Հովսեփյանի զրպարտության և վիրավորանքի միջոցով պատվին, արժանապատվությանը և բարի համբավին հասցված վնասի հատուցման պահանջի մասին։

Դատարանը կայացրել է վճիռ, որով գտել է, որ Հայկ Զարեհի Սարգսյանի հայցն անհիմն է և ենթակա մերժման։ Դատարանը Հայկ Սարգսյանից հօգուտ Արիանա (Արմենուհի) Հովսեփյանի բռնագանձել է նաև դատական ծախս՝ փաստաբանի խելամիտ վարձատրության գումարը։

Newspress.am-ի ողջ անձնակազմը` Արիանա Հովսեփյանի գլխավորությամբ, հատուկ շնորհակալություն է հայտնում Արիանա (Արմենուհի) Հովսեփյանի շահերը ներկայացնող «Ռայթ փրոթեքթ» փաստաբանական գրասենյակի հիմնադիր-տնօրեն փաստաբան Գարիկ Սահակյանին՝ մասնագիտական բարձր պրոֆեսիոնալիզմ և գործի հանդեպ ջանասիրություն և հետևողականություն ցուցաբերելու համար։

Շնորհակալություն նաև գործը քննող դատավոր Ավագ Գաբրիելյանին՝ կայացրած արդար դատական ակտի և գործով արդարադատություն իրականացնելու համար։