Լրագրողների հետ նախատոնական հանդիպումն ամենասպասվածն է վարչապետի համար. (տեսանյութ)

Այսօր՝ դեկտեմբերի 29-ին, Ամանորի եւ Սուրբ Ծնունդի առթիվ ՀՀ կառավարության նիստերի դահլիճում լրատվամիջոցների ներկայացուցիչների տոնական ընդունելության ժամանակ ՀՀ վարչապետ Հովիկ Աբրահամյանը պարգևատրեց մի շարք լրագրողների ՀՀ կառավարության գործունեությունը մշտապես լուսաբանելու, ինչպես նաեւ ակտիվ համագործակցության համար: ԶԼՄ-ների մի շարք ներկայացուցիչներ Հովիկ Աբրահամյանից ստացան ՀՀ վարչապետի հուշանվեր` անվանական ժամացույցով եւ խրախուսվեցին ՀՀ վարչապետի շնորհակալագրով:

Շնորհավորելով ներկաներին ամանորյա տոների առթիվ՝ կառավարության ղեկավարը, մասնավորապես, նշեց.

«Հարգելի լրագրողներ, գործընկերներ,

Յուրաքանչյուր Ամանոր ես՝ որպես Հայաստանի Հանրապետության վարչապետ, հանդիպում եմ մեր հանրության տարբեր ներկայացուցիչների հետ՝ միասին քննարկելու անցնող տարվա ձեռքբերումներն ու բացթողումները, ծրագրելու եկող տարվա անելիքները։

Անկեղծորեն պիտի ասեմ, որ ինձ համար ամենասպասված հանդիպումներից մեկը լրատվամիջոցների ներկայացուցիչների՝ ձեզ հետ հանդիպումն է։ Վստահ եմ, որ անկաշկանդ մթնոլորտում այս հանդիպումները հրաշալի հնարավորություն են՝ միմյանց հետ անկեղծ խոսակցության, որը վստահաբար եւ ինձ համար է կարեւոր, եւ, հույս ունեմ, նաեւ ձեզ համար։

Այսօր՝ տեղեկատվական բազմազան հոսքերի մեր ժամանակներում, ավելի քան պահանջված են այն լրատվամիջոցները, որոնց պրոֆեսիոնալիզմից, անաչառությունից եւ նաեւ քաղաքացիական խիզախությունից է կախված, թե ինչպես են հանրությանը ներկայացվում այս կամ այն փաստը, իրադարձությունը։ Միշտ չէ, որ ես համաձայն եմ եղել ու համաձայն եմ այս կամ այն լրատվամիջոցի որոշ հրապարակումների հետ, որոնք չեն եղել անաչառ եւ փաստարկված։ Այո, երբեմն նաեւ դառնություն եմ ապրել, երբ հանդիպել եմ հստակ ուղղորդված եւ որեւէ փաստից զուրկ հրապարակումների եւ ոչ միայն ինձ առնչվող։ Անգամ իմ ամենաարմատական ընդդիմախոսի հասցեին սուբյեկտիվ եւ ուղղորդված հրապարակումը, վստահեցնում եմ ձեզ, երբեւէ ինձ չի ուրախացրել։ Նման հրապարակումները, ցավոք, ստվեր են գցում մեր մամուլի վրա, որը ես համարում եմ անկախության մեր ամենամեծ նվաճումներից մեկը։

Լրատվամիջոցների հարգելի ներկայացուցիչներ,

Մենք միասին երկար ճանապարհ ենք անցել։ Վստահ կարող եմ ասել, որ արդար, փաստարկված, անաչառ քննադատությունն անչափ անհրաժեշտ է ցանկացած իշխանության՝ միշտ զգոն լինելու եւ հանրության զարկերակն զգալու համար։

Ես ինքս մշտապես հետեւություն եմ արել օբյեկտիվ քննադատությունից։ Քաղաքական գործչի ուժը նաեւ նրանում է, որ կարողանա ճիշտ եւ սթափ հետեւություններ անել սրտացավ, գրագետ քննադատությունից, որից քաղաքական գործիչը դառնում է շատ ավելի ուժեղ։ Հայտնի խոսք կա՝ երկիրը վերահսկողն օրենքներն են։ Օրենքների կատարման վերահսկողը քաղաքական գործիչներն են։ Քաղաքական գործիչներին վերահսկողը հանրությունն ու հասարակական կարծիքն է։ Իսկ հասարակական կարծիք ձեւավորում է միայն անաչառ եւ պրոֆեսիոնալ մամուլը։ Ահա որքան կարեւոր է ձեր առաքելությունը։ Պրոֆեսիոնալ եւ սեփական աշխատանքին պատասխանատվությամբ վերաբերվող մամուլը, իրապես, հզոր ուժ է։ Ուժ, որը նաեւ կարող է անմեղին դարձնել մեղավոր, իսկ մեղավորին՝ անմեղ։

Սիրելի լրագրողներ,

Վստահեցնում եմ, որ ձեր մատնանշած որեւէ խնդիր երբեք չի վրիպել իմ ուշադրությունից։ Իմ աշխատանքային օրն սկսվում է ձեր հրապարակումներին ծանոթանալով։ Ու շնորհակալ եմ, որ ձեր բազմաթիվ հրապարակումներ, հաղորդումներ, որոնք վեր են հանել իրապես խորքային մի շարք պրոբլեմներ, օգնել են ինձ՝ որպես վարչապետի դրանց օպերատիվ լուծում տալու։ Հույս ունեմ, որ մեր համատեղ աշխատանքը մենք շարունակելու ենք միմյանց օգնելով, շարունակելու ենք միմյանց լսելով եւ վստահելով, քննադատելով, բայց ոչ երբեք չարախնդալով, վեր հանելով իրական պրոբլեմը, բայց ոչ երբեք մտացածին, չփաստարկված լուրը դարձնելով օրվա սենսացիա։

Մեր երկիրը թե՛ ներքին, եւ թե՛ արտաքին բազմաթիվ զգայուն խնդիրներ ունի։ Եվ այսօր, առավել քան երբեւէ, ամեն մեկս մեր տեղում պետք է կրկնապատկված պատասխանատվությամբ վերաբերվենք մեր կատարած աշխատանքին։ Յուրաքանչյուր անզգույշ ասված ու գրված խոսք կարող է անդառնալի վնաս հասցնել։ Մտածենք այդ մասին։ Մտածենք, որովհետեւ ես հավատում եմ, որ դուք բոլորդ սիրում եք մեր երկիրը, եւ մեր բոլորի նպատակը մեկն է՝ արդար, բարեկեցիկ ու քաղաքակիրթ աշխարհում մրցունակ երկիր ունենալը։

Շնորհավորում եմ ձեր բոլորի Նոր տարին ու Սուրբ Ծնունդը: Անկեղծորեն հավատում եմ, որ միասին մենք հասնելու ենք մեր նպատակների իրականացմանը»:

Մանրամասները` տեսանյութում