Ռոբերտ Քոչարյանի մեսիջը համընկավ Սերժ Սարգսյանի մեսիջի հետ. քաղտեխնոլոգ

Քաղտեխնոլոգ Տիգրան Քոչարյանի գնահատմամբ, ՀՀ երկրորդ նախագահ Ռոբերտ Քոչարյանի ասուլիսում շատ կարևոր հայտարարություններ հնչեցին։ Քաղտեխնոլոգի խոսքով, Ռոբերտ Քոչարյանը վերջակետ դրեց այն մարդկանց գործողություններին, ովքեր փորձում էին համոզել, որ Սերժ Սարգսյանն ու Քոչարյանը ընդդիմադիր դաշտը չեն կարողանում կիսել ու փորձում էին, ըստ քաղտեխնոլոգի, «կռվեցնել նրանց»։

«Քոչարյանը կրկնեց նույն Սերժ Սարգսյանի գաղափարը, որ պետք է հեղափոխությունը, հեղաշրջումը կամ իշխանափոխությունն անել ոչ թե ասելով, ով պետք է գա իշխանության, այլ սկզբից հեռացնել ներկա իշխանությանը և հետո հասկանալ, ինչպես կառավարել իրավիճակը»,- ասուլիսում ասաց քաղտեխնոլոգը։

Նրա խոսքով, բոլորը հստակ հասկանում են, որ ընդդիմադիր դաշտը բաղկացած է մի քանի խոշոր խաղացողներից, և եթե խոշոր խաղացողները չմիանան և կրկին կոնսենսնուսի չգան` Նիկոլ Փաշինյանը բավականին հեշտությամբ կկարողանա տիրապետել ներքին իրավիճակին և պառակտել ընդդիմությանը:

«Դրա համար շատ լավ էր, որ այդ մեսիջը գնաց, որը համընկավ Սերժ Սարգսյանի մեսիջի հետ, որ սկզբից պետք է լինի իշխանափոխություն, հետո հասկանալ ապագա իշխանությունն ինչ կառուցվածք է ունենալու»,- ասաց Տիգրան Քոչարյանը։

Փողոցային պայքար սկսելու համար, ըստ քաղտեխնոլոգի, հեղափոխական դասական օրենք կա՝ կրիտիկական զանգվածը պետք է հասունանա։

«Որպեսզի իրավիճակը հասունանա, մարդկանց մեջ պետք է առաջանա այդ ցասումը։ Ժամանակ է պետք։ Հիմքը կա, որովհետև տեսնում ենք, որ Փաշինյանին գլոբալ առումով չեն սիրում, Փաշինյանի անձնական ռեյտինգը բավական ցածր է, ինչն ապացուցեցին տեղական ինքնակառավարման մարմինների ընտրությունները»,- ասաց նա։

Տիգրան Քոչարյանն ընդգծեց, որ կա ընդդիմադիր դաշտ, կա ընդդիմադիր դաշտի տոկոս և եթե դերերի ճիշտ վերաբաշխում լինի, խանդի, նախանձի տեսարաններ չլինեն, հստակ ամեն կողմը հասկանա իր անելիքները, բավականին հեշտ հարցերը կլուծվեն։

Նրա խոսքով, կարևոր է հասկանալ նաև այն, թե ինչի պատճառով եղան արտահերթ ընտրությունները, այդ բոլոր հանգամանքները չեն վերացել:

«Արցախի 75 տոկոսը շարունակում է մնալ Ադրբեջանի օկուպացիայի տակ, Սյունիքի ճանապարհների մի մասը վերահսկում են ադրբեջանցիները, 30 հազար փախստական կա Հայաստանի տարածքում, գները բարձրանում են, արտաքին պարտքն ավելանում է և ՀՀ անվտանգային համակարգը բավականին թուլացած է, բանակը խնդիրներ ունի»,-ասաց քաղտեխնոլոգը։

Սակայն, ըստ քաղտեխնոլոգի, միայն փողոցային պայքարը բավարար չէ, պետք է լինի նաև որոշակի ներքին էլիտաների պառակտում, ինչպես եղավ անցած տարի հունվար-փետրվարին, երբ նախագահը, կաթողիկոսները, Գլխավոր շտաբը պահանջեցին Փաշինյանի հրաժարականը։